عفاف

عفاف ..
والقلب زى الهوا شفاف
عيونى ما رأت مثلك
جميلة الشكل والاوصاف

عفاف

عفاف

عفاف

بسيطة زى طفل
رقيقة زى نسمة
تاخد معاها القلب
من غير ولا كلمة

زى الفراشة بتتحرك ..
من غير ما حد يحس بيها
ولما بـ تيجى وتتكلم..
تاخدك سهولة معانيها 

وترد بكل حكمة ..
وتدافع ع الصواب
الله مديها نعمة ..
فى الرد عند الجواب

عفاف بتلبس على ذوقها ...
مش اى حاجة بتعجبها
عفاف على طول ديما تختار ..
حسب ما يناسب مبادئها

تعالو هنا يا بنات شوفوا..
عفاف اهى فى افضل صورة
قوية زى هرم خوفو ..
وضعيفة زى العصفورة

لو خيالها يمس موتنا ..
كل الخلايق راح تقوم
بلمسة من روحها لروحنا..
راح تزيح كل الهموم

اتعب اروح اشتكى ليها ..
تفهمنى وتداوى جروحى
عفاف دى محدش زييها ..
عرفانى اكتر من روحى

عفاف الكلمة اللى تشجع ..
عفاف الدعوة اللى بتبنى
عفاف الايد اللى تطبطب ...
عفاف اما ابعد بتجيبنى

بعقل يفكر ويشارك ..
والحال فى وجودها بيتغير
الله الله ..الله الله ....
الله ع البنت اللى تحير

بقلب يصالح ويسامح
لا خصام ولا غدر ولا نميمة
ولا قالت مرة كلام جارح...
عفاف دى يا عالم ترنيمة

حسناء المظهر والجوهر..
حسناء الظاهر والباطن
طبعى البشرى.. تطور ..
وتغير الوضع ..الراهن

عفاف

عفاف

عفاف

انا قلبي مش قادر
يكسر لها خاطر
اترك بلاد اهلى
وانصب هنا شادر

واذكرها تاخدنى
فى حالة صوفية
تلمسنى اتكلم .. ..
بـ فلسفة حية

دى سيرة وخدانى
اسرانى فى معانى
خلقانى من تانى ..
بقدرة الهية

افقدنى فلقانى
راجع لها تانى
فى عشق روحانى ..
بالدم والمية

عفاف عاف عاف

يا لهفة المشتاق
يا رعشة الساجد
يا لوعة العشاق
يا دمعة العابد

قولى لنا متى الرحيل ...
لاجل ناجى نودعك
نفرشلك اوراق النخيل ...
وتاخدى ارواحنا معك

يا بسمة القلب الحزين ...
يا ندى يرطب ورقنا
بعد ما عرفناكى زين ...
دلوقتى حان وقت افتراقنا