متكفرنيش

متكفرنيش
ومتبرقليش يابنى بعينك
حد الله ما بينى وبينك
لاتدخل دينى
ولا ادخل دينك
حد الله مابينى وبينك
سيبنى اعيش ومتكفرنيش

مصر بلدنا ... ليا وليك

متخفش منى .. انا اخاف عليك
وممكن والله بروحى افديك
فامتبرقليش 

ومتكفرنيش
سيبنى أعيش 

 

المراكبى

غريق يا بحر العاشقين
ومين يقدر على امواجك ؟
ولا بتروى العطشانين
ولا بيقلو حجاجك

فردت قلوعى ومقلاعى
ورميت شباكى ع المية
وقلت هصيدك بدراعى
يا ست الحسن يا صبية

وعملت م الشوق مجدافى
ومراكبى عامت ع المية
وحلفت اشيلك ع كتافى
وانا راجع بيكى يا حورية

  ويا البحر سهران
ودموعى تواسينى
ويا النجوم محتار
وشكوكى تجارينى

بحرك ده مهايسعنيش
ده انا مركبى طايره
وبعدك مطفانيش
لسه النيران قايدة

عاشق ولا بيديش
انساكى يا حورية
عوزانى ازاى اعيش ؟
وانا قلبى مش فيه

الفرح

(1)

جوه الفرح
فيه ناس كتير متجمعين
دول القرايب
ودول الحبايب
ودول ناس
مستعبطين
جوه الفرح
فى ناس كتير متجمعين

(2)
جوه الفرح
فى ناس كتير متجمعين
عاشو السعادة ويا الازازة
سعادة لكن
بتخلص فى حين
جوه الفرح
فى ناس كتير متجمعين


(3)
جوه الفرح
فى ناس كتير متجمعين
فيه المهنى
وفيه المغنى
فيه المتحى
بسجارتين
جوه الفرح
فى ناس كتير متجمعين


(4)
جوه الفرح
فى ناس كتير متجمعين
على الموائد مقبلين
والكل وارد
خمره وحشيش
ع الشيشة
 قايد
جوه الفرح
فى ناس كتير متجمعين


(5)
جوه الفرح
فى ناس كتير متجمعين
فى رقاصة
بتذيد مياصة
فى عيونها عاوزه
رصاصتين
جوه الفرح
فى ناس كتير متجمعين


(6)
جوه الفرح
فى ناس كتير متجمعين
فيه البيراتى
ماشى يهاتى
ماشى يفتح
للمعزومين
جوه الفرح
فى ناس كتير متجمعين


(7)
جوه الفرح
فى ناس كتير متجمعين
فيه المعلم واقف جنابو
وفارد شنابو
مستنى ينقط
رزمتين
جوه الفرح
فى ناس كتير متجمعين


(8)
جوه الفرح
فى ناس كتير متجمعين
فيه المكافح
ودمه طافح
بيطفى نارو
بسجارة
وقزازتين
جوه الفرح
فى ناس كتير متجمعين


(9)
جوه الفرح
فى ناس كتير متجمعين
على الكراسى مجلسين
انصاص رجال
وانصاص عيال
واشباه رجال
ومغيبين
جوه الفرح
فى ناس كتير متجمعين


(10)
جوه الفرح
فى ناس كتير متجمعين
اطفال شوارع
متبعترين
على الصوانى
مبحلقين
يمشى واحد
ييجى عشرين
جوه الفرح
فى ناس كتير متجمعين


(11)
جوه الفرح
فى ناس كتير متجمعين
رجال حكومة محترمين
فى وسط القعده منورين
على الكراسى مكرسين
يارب كتر يارب بارك
قولو امين
جوه الفرح
فى ناس كتير متجمعين


(12)
جوه الفرح
فى ناس كتير متجمعين
فيه شيوخنا المئنتخين
حشيش وبيره
صقارة وستيلا
ويقولو مش منكر
ده فيتامين
جوه الفرح
فى ناس كتير متجمعين


(13)
جوه الفرح
فى ناس كتير متجمعين
فى الفرح لكن
الحزن ساكن
ومالى الاماكن
من سنين
جوه الفرح فى ناس كتير
متجمعين

انا حاوى

(1)
انا شغلى حاوى
بتمتم كلامى
واغنى غناوى
واجيب الحاجات
اجيب اللى تاية
 واجيب اللى غايب
واشوف اللى فات

 (2)
اتفتحلى ايدك
هدلك  هفيدك
واقولك دليك
واوصفلك دواك
ومتقولش انت مين
انا عارف انت مين
وعارف حبيبك
اللى غاب من سنين

(3)
وانا قلبى اللى تايه
فى وسط الحارات
فى وسط الشوارع
ووسط البارات
يطوف ع القهاوى
ويطوف ع المبانى
ويفوت ع البيوت
يصبر
يداوى
ويحكى حكاوى
فى عشق البنات

(4)
وحبيبتى حبيبة
قريبة وبعيدة
وامها عنيدة
رافضة الوصال
ودورنا وشكينا
وسهرنا وبكينا
وغيرنا شفينا
وجراحنا تملى
بتنزف جراح
 (5)
ولسه املنا
تانى ف وصالنا
رافض يسبنا
ورافض يخونا
ورافض يزعل
ست البنات

يالهوى عليكى ياحنة

يالهوى عليكى
بدوب فيكى
وعشان عنيكى
سهرت الليل
وعلشان اشوفك
شوفت الويل
ودوقت المر
ومهما تغيبى مستنيكى
انشالة تغيبى مليون دهر
انا هستنى ومش هتململ
حتى ان غبتى طول العمر
وايه يعنى لما استنى
انا حبيبتى تستاهل
واصل الحب مش بالساهل
ولا بالساهل نجيب المهر
ومهما تعبنا ييجى ميت شهر
اصل مهر حبيبتى انا غالى
والله عشانها ابيع راسمالى
ده انتى يا حنة والله حبيبتى
ونفسى تكونى ام عيالى
عودى يا حنة وانا اوريكى
وانا اخليكى فى نن عيونى
ومهما يكون مش هتهونى
ولا هتكونى ف النسيان
حبك ده مخلوق للذكرى
خليكى فاكرة
انى بحبك ومليش غيرك
وانى يا حنة قلبى اسيرك
لحد ما تيجى وتضمينى
واخدك فى ايدى لحد الهضبة
ده احنا بنينا هناك هيكلنا
وهناك صلينا وهناك ركعنا
وفضلنا نصلى لما شبعنا
بكرة تعودى ونروح تانى
وميبقاش القمر وحدانى

نقعد انا وانتى نعاتب فية
ونخلية يضحك من تانى
ونفتكر ايام البعد
ايام الغربة
ويا كل ظروفنا الصعبة
ونقول والله كانت ايام
كان الشوق فيها بركان
وكان القلب ميبطلش
صراخ ونواح ...من كتر جراح
بعدك عنى 

اكمنى انا قلبى ميتحملش
فراق احبابو
وادى اللى نابو
عودى ياحنة علشان خاطرى
اديكى عارفة ان مليش غيرك
كتر خيرك حاسة بحالى
وشافقة عليه 
عودى ياحنة
وخودى عنيا

حنة

وانا بموت فيكى
 وشعورى بيكى
فاق حواسى
ومش قادر اتحمل
حبك عملى صداع فى راسى 
واااه يا ناسى
اتملى كاسى
فراق احباب
وادى اللى نابنى 
من الحبايب
والكل له نايب
 فية اللى دايب
 وفية اللى تايب
وفية المكوى بنار فراق
وده نايبى من حبايبى
نار فراق بتكوى قلبى

وطفش قلبى مابين ضلوعى
وجف ينبوعى
من كتر دموعى
عليكى يا حنة
وانا بتمنى تعودى تانى
ويتملى كاسى فرح واغانى
ونقول من تانى شعر واشواق
والمشتاق اللى دايب
يطوله نايب من الافراح
ويعيش مرتاح
متهنى بالحبايب
وقلبى اللى دايب
مستنى حنة

مينا مات!!!!!!!

مينا مات
مات البطل
وساد السكات

مينا مات يعنى مات
يعنى خلاص مش هنشوفك
ولا هنضمك ولا هنبوسك
ولا هنقابلك تانى فى الثورة 

قولى يا مينا قتلك مين ؟
طب كانو رصاصة ولا اتنين؟

طب اول طلقة جاتلك فين ؟
جات فى القلب؟ 
ولا الزور؟
جات فى الزور 
علشان كنت ناوى تقول 
كلمة حق
قالولك لا 
مش هتقول 

مينا مات مش مصدق

ومين كان فى يوم يصدق
انك انت يامينا تموت
وان الجيش عليك هيفوت
يدهس راسك مليون حتة
وبنيرانو ...... قتل الجتة 

واااااااااه يا حنة
مينا مات .... ايوة يا حنة

لسة انا فاكر
 شكلة.. وصورتة
ولا... الضحكة 
كانت تشرح قلب العاصى

لسة انا فاكر 
ومنيش ناسى
يوم الثورة .... كان بينادى
فوقو وقومو يا شعب بلادى

كان لة صوت يهز ميدان
والتعبان والكسلان
والخجلان والضعفان
كان بيقوم مفزوع على صوتة
كان له صوت كان له كلمة
كان له فكر وكان له نعمة

وكان له نشاط
والله انا شفتة بنن عنيا
فى التحرير بيدور حوليا
كان بيكلم يجى خمسين

كان بيثور فى الثوار
كان بيقول
ثورو 
وثورو 
وثورو كمان
خلو الثورة فى كل مكان
خلو الثورة للانسان

كان انسان؟

لا مش انسان

 دة كأنه نبى
كان له نور زى البدر
واحنا كلنا نادرين ندر

بعد يامينا ماخد تارك
وبعد ما يكمل مشوارك
لادبح عجل 
واوزع ورد
واروح لامك حد البيت
واخد فيدى الطبل البلدى
وانا ارقصلك حد الصبح

واروى الشجرة
اللى زرعناها ف التحرير
هاخد تارك من المشير
شايل تارك ليوم الدين
هقتلة امة 
واختو وعمة
والله يا مينا لاسيح دمة
ابن الواطى اللى ملوش كلمة
اه والنعمة ابن الكلب شايل زنبك
ابن ......عامل اسد وهو اسد
وابوة اسد تبقى امة اية؟.....
يعنى انا مغلطش فية

مرة يغير فى كلامة

ومرة بيضرب فى الثوار

ومرة يعمل فيها جبان

ومره يصهين ع الجنود
اللى اتقتلو ع الحدود

مرءاة بره
وراجل جوة
ومش بالقوة 
تعمل راجل
يابن الفاجر ... 
العيب على امك
لو كانت امك ربتك ... 
كانت لمتك
عن الازية فى خلق الله
منك لله 
يابن الظالمة
وحياة امك لافتح راسك
وافتح كرشك ... 
المشفوط
يا كتكوت .. 
يا هلفوت
مرة تفوت ولا حد يموت
لعبة امك باظت منك
وصابت مينا اللى ابوه دانيال

ابو مينا عمال يبكى ويقول يا ضنايا
اوعى تسبنى ... خليك ويايا

وامك تصرخ وااااه يا ضنايا
واه ياحبيبى ... 
واه ياجرحى واه ياطبيبى
وادى نصيبى .. 

وميلة البخت المايل يابنى
قتلوك عسكر غصبا عنى ...
جالك قلب يا ولدى تسيبنى؟

مليت امك وعمك واختك
مليت ناسك اهلك وصحابك

خليك يابنى معاية شوية
ولا شوية كتيرة علية

وانا عم بسمع واصرخ ااه
صاحبى صاحب الثورة
وصاحب الكلمة
صاحب الحق
وصاحب الضعفاء

كنا نقوله يا مينا يا مسيحى
وكان يضحك... ويضحك
واحنا كمان 
كنــــــــــــا بنضحك
اصلى انا كمان 
كنـــــــت مسيحى

والله الكلمة دى بقيت عار
واللى يقولها يطخ بالنار

ياله القصد ... 
مش مهم

بس انا برضو هاخد تارك
وبرضو هنكمل مشوارك
وامسح بيدى دمعة امك

مع السلامة يا ابو الابطال
يا شجاع 
يا فارس 
يا اخويا
الفين بوسة على خدينك
والفين تانى على جبينك
نام واتهنى
وادخل جنة او فردوس
واستنانا هناك 
فاللى باللى بالك
نام وارتاح
ومتنساش تشفع عنا

قليل البخت من يومك

قليل البخت من يومك
تنام تصحى على همومك
ويتلون سواد يومك سواد
اكحل من الكحلة

 الحمل تقيل ومين يحمل
فراق خدودك المخمل
بتحلم الحلو يكمل ولو يكمل
بيبقى سراب

يهون الليل لو يطول
مادام الليل بعدو نهار
وانا ليلى ملوش اخر
ولا بينهار

لا انا هحلم ولا اتمنى
ولا ابنيلى سما وجنة
مادمت بعيدة يا حنة
انا فى عزاب

اديك ماشى وراد الباب
ومن تانى مليش احباب
ولا ميت ولا صاحى ولو ترجع
ابوس الاقدام

بلاش ياولدى تسافر

واه يا عبد المجيد
تركت الفاس ويا المندل
وعاوز تهرب بره بلادك
وتقول على عيشتك حنضل

كاره العيشة وكارة الناس
وعاوز تسكن فى البندر
وملت ايدك مسك الفاس
ونفسك تمشى وتتغندر

بس يا ولدى الحمل تقيل
قسوة عيشة ويا احباب
ودموعى بلت مناديل
وانا عجزت وشعرى شاب

القصة الاولى

‎

والله يا حواء والله زمان
اصل الفرقة دى م الطغيان
فاكرة يا حواء وفاكرة زمان
فاكرة الشجرة تحت الضلة

ياما شبعنا هناك احضان
ياما جرينا وياما لعبنا
وياما هربنا من الرحمن

فاكرة لما كان بينادى
واحنا ف قمة الغليان
كنا بنعمل مش سامعين
ومش عاوزين نلبى نداء
كنت انا حاير
معرف طاير؟
ولا انا ماشى فوق الماء

فاكرة يا حواة اول بوسة
كانت بوسة ...يااااااااه
جابت رعشة وقلنا الاه
  ولو نتعب كنا ننام
حتى نكمل فى الاحلام
وفى احلامنا كنا ... يااااه
وكنا برضو بنقول ....الاه
ولما بنتعب كنا بنصحى
من نفسينا او على صوت الله

والمرة دى صحيت على صوتك
قمت لاقيتك عند الشجرة
وقبل ما اصرخ واقول حواء
شفت ف ايدك نص الثمرة
قلت يا حسرة ضاعت حواء
لازم تنطردى من الجنة
وانا لا هفرح ولا هتهنى

خدت بايدى النص التانى
قلت انا برفض اعيش وحدانى
وبرفض انك تطرد حواء
لو عاوز ممكن بالقوة

فجأه لاقيت اتنين خراتيت
واحد اهبل والتانى عبيط
بيقولو يالا ياكتاكيت
لم عزالكم واطلعو برة
فجأه لاقيتنى برة الجنة

وقبل ما اصبر ولا استنى
بسرعة لاقيتنى بقول لله
اية يعنى تطردنى من الجنة؟
وازاى جنة ومن غير حواء؟
بكرة انا ارضى هتصبح جنة
طول ماانا ايدى فى ايدك حواء
والرجلين هتدب بقوة
برفض انك تطرد حواء

لاول هصلى واتوضى

لاول هصلى واتوضى
ولما افوق من الخضة
مش متأكد انى هرضى
بس هفكر فى كلامك

على فكرة انا فاكر
كل كلمة من كلامك
كل شخطة وكل نترة
وكل شدة من لجامك

عوزانى دايما اكون
ورقة وتحت اقدامك
وبالاجبار لازم اصون
كل حرف من كلامك

ولا اتشخط ولا اتأمر
مهما غيرتى احوالك
ولا اشكى ولا اتذمر
مهما شمتى عزالك

عوزانى دايما اكون
كما الخاتم فى صباعك
ولا عاشق ولا مجنون
بس شنطة وفى دراعك

عوزانى اكونلك مطيع
اسمع من غير ما اناقش
وافهم من غير ما اجادل
ويكون فهمى سريع

ونفسك ابطل كسوف
وابقى واد كده ع الموضة
واقلع كتانى والبس صوف
وتنامى ف اوضة وانا ف اوضة

بس انا والهى كان نفسى
تكونى اميرة وف قصرى
وتصونى الخطوة طوالى
ولا تسببى مره فى كسرى

ياللى انتى من لونى القمحى
عارفة مقامى وملامحى
لية تبعترى بس فى قمحى
وبتشمتى لية؟  عزالى

معلش و أسف .. غصب عنى
مقدرش اقبل كلامك... لكنى
لو عاوزة تكونى ف العين كما الننى
خليكى كما المهره وانا بس اللى خيالك

اسمع منى هقولك اية؟

اسمع منى هقولك اية؟

خودها منى نصيحة يا بية
اوعى تأمن يوم للخاين
لو حتى روحك فى ايدية
ولو جالك مره فى دارك
اقفل دارك انت علية
ايييييييية اوعى تصدق

اسمع منى هقولك اية؟
خودها منى نصيحة صريحه
اوعى تكون راجل تلقيحه
بطل كلمة انا مش قادر
خليك فاكر انك راجل
وعمرك مره ما كنت مهان
اييييييية اوعى تسلم

اسمع منى هقولك اية؟
خليك فاكر انت مناضل
وشهر يناير يشهد ليك
خليك ثابت.. صامد.. جامد
وتاريخك اعمله بايديك
خليك ثورى اوعى يهمك
الا الناس هتسب فى امك
ومصر دى امك

اسمع منى هقولك اية؟
وكلامى انا هحكى علية
اوعى تفكر ان عدوك
ممكن يحبك زى اخوك
واوعى تفكر ان جوز امك
ممكن يخصك زى ابوك
ايييييييه اوعى يهمك

اسمع منى هقولك اية؟
وخلى كلامى يابنى معاك
اوعى تفكر ان الدونيا
تفضل كده على طول كرهاك
لو انهارده بتكسف وشك
بكره يا صحبى تكون وياك
ايييييية اوعى تكشر

متحرمش

متحرمش
من ده رمش
بيجرح ويداوى
واصلى انا غاوى
جرح رموشك
والله ما احوشك

اجرح فيه واتمنظر
ولا يهمك ولو مين كان؟
فى نفس الصورة والمنظر
ونفس الجرح بتاع زمان

 ولسة الجرح مستنيك
ولسة الرمش بياثر
وتدلى دموعى ف عنيك
مشتاقه للجرح مش اكتر

تبكى لية؟

تبكى لية؟
علشان وطن
مات واندفن
والبكاء واجب علية

تبكى لية؟
علشان انسان
ضعيف غلبان
وعيونك زعلانه علية

تبكى لية؟
علشان مريض
سارح شريد
والكنسر بيقتل فيه

تبكى لية؟
علشان مظلوم
بالاعدام علية محكوم
بينة وبين الموت ساعتين
تبكى لية؟

زى العادة

زى العادة
حياتى مر وبزياده
اكيد بشربها لكن
بشربها قهوة سادة
وزى العادة

وزى العادة
كل متعب اقوم امشى
صحيح بمشى لكن برجع
اللى مشيته وزيادة
وزى العادة

وزى العادة
اجى احلم فى منامى
الاقى احلامى كرهانى
ولا بكره ولا بطلت احلامى
وزى العادة

الحب عادة
تكره تعشق زيادة
تقرب تبعد زيادة
وكل ما تبعد تتمادى
وزى العادة

وزى العاده
اعشق ناس بتنسانى
وانسى ناس بتهوانى
ولسة بعشق من تانى
وزى العادة

وصف نفسى

1. انا هو وانا الذى وعندما شئت فعلت
   انا البدايةوالنهاية وحيثما كنت وجدت
   
   

ماشية السنيورة

ماشية السنيورة بتغندر
فى وسط الحارة تتمخطر
لاده عاجبها ولا ده عاجبها
وعلى خطابها بتتأمر

ماشية السنيورة بتدلع
على كل اصحابها بتتقمع
دية حوله ودية عمشة
ودية هطلة ودية طرشة

ماشية السنيورة وشيفانى
وعاملة قال مش عرفانى
وادى روجك ملون خدى
وعطرك لسة ف ثيابى

ماشية السنيورة بتتفشخر
باللى يصفر واللى يزمر
واللى بيلمس واللى بيهمس
وباللى شافها وقال اه يانى

علشان اية ممكن تموت؟

علشان اية ممكن تموت؟
علشان فكرة؟ علشان دين؟
اياك فاكر لما تموت
دينك هيرقع بالصوت

وافكارك عليك هتموت
 ويقولولك ارجع
لا اسمع
اوعى تموت

علشان اية ممكن تموت؟
علشان ارض؟ علشان طين؟
اياك فاكر لما تموت
ارضك راح ترجعلك
او اعدائك راح تدمعلك
وترجعلك ارضك
لا فى عرضك
اوعى تموت
علشان اية ممكن تموت؟
علشان شرفك؟ علشان عرضك؟
اياك فاكر لما تموت
شرفك راح يفيد
او عرضك راح يذيد
اقولك بينى وبينك
مش اكيد
فاوعى تموت
علشان اية ممكن تموت
علشان ولدك يعيش من بعدك
اياك فاكر لما تموت
ولدك راح يعيش
ويلاقى عيش
ويلبس ريش
لا مفيش
فاوعى تموت
اوووووعى تمووووووت

وااااه يامة

واه يامه واه على قبرك 
والله ياريتنى مت انا قبلك 
ولا بكيتك ولا رثيتك 
ولا صرختك اه من قلبى 

  واه يامة واه يا ضنايا 
والله موتك ساب جواية 
نار وحسرة وحزن واه 
حبك عمرى ما يوم انساه 

  واه يامة واه يا حبيبة 
والله لسة السكة بعيدة 
قالو هشوفك لما اموت 
وانا عم بدعى العمر يفوت 

  واه يامة واه يا طبيبة 
والله يامة طالت الغيبة 
وادى المر بيروى حياتى 
وغابت الحنية والطيبة 

اه يامة واه من تانى 
اصلك يامة انتى وحشانى 
نفسى اشوفك ولو ف خيالى 
يوم من تانى .... وتضمينى 

  واه يامة وكان ياما كان 
كانت الضحكة يامة زمان 
كان لينا ام وكان لينا حضن 
وكانت الفرحة فى كل مكان
  
  واه يامة واه مين قال 
ومين غيرك ربى رجال 
لا بتشتكى من العيشة المرة 
ولا حتى من ضيق الحال  

واه يامة واه ياصبورة 
من الامراض كنتى مقهورة 
ولا السكر بيذيد من حزنك 
على اولادك دول من بعدك
  
  واه يامة ومتقوليش 
طب فاكرة يامة يوم الديش 
لما ضحكت وقلت لبست 
فى لحظة لاقيتك اغمى عليكى
  
  واااه يامة وانا راح اقوم 
وهجيلك تانى زى اليوم 
وهفضل اقولك واحكيلك 
وعلى باب قبرك اشكيلك

حطة يا بطة

حطة يا بطة يا فلفل شطة
جوه همومك نام واتغطى
انسى سلاحك وانسى كفاحك
وان فى بلدك كان فية ثورة

حطة يابطة وبطة يا حطة
والله وقعت فى حتة ورطة
ضحكو عليك وقالو عدالة
وادى الكوسة ليها مكانه

حطة يا بطة بطة مين
هى الثورة قامت فين؟
قامت برة ولا قامت جوة
ولا الثورة جاتها الدورة

حطة يا بطة اه يا جمالك
والله ياحسنى كبرو عيالك
ادى مشيرك وادى جمالك
وادى قضاتك زى اخواتك

حطة يا بطة وحطة كمان
سرقو الثورة من الجدعان
وادى الجيش يا ناس سكران
عمال يضرب فى الثوار

حطة يا بطة وحقة يا فالح
طعم الثورة ده كده لية مالح؟
يكنش المجلس ناوى يخربها
ويخليلنا الصالح طالح


حطة يابطة وادى اللى كان
كان الجيش مع الاخوان
ادى حاميها وادى حراميها
والنورية فى كل مكان