الكلمة الحلوة

الكلمة الحلوة منك
نفسي اسمعها كتير
بتفرح ليا قلبي
بتخلينى اطير

مبحسش نفسي وانت
بتتكلم معايا
معرفش ان كنت بحلم
ولا اية الحكاية 

تعرف !... ان غبت عنى
الكون يلبس سواد
ترتحش الروح فى مطرح
واكره كل البلاد 

دا كفاية النظرة منك
بتقول للروح كلام
ووجودك انت جنبي
بيحسسنى بسلام

نفسي تحس بشعورى
وتجرب يوم هوايا
وتحسسنى بحضوري
ياحبيبي انت الكفاية 

انا مهما هحكى عنك
او حتى هقول عليك
فى شعوري بالسعادة
الفضل كله .... ليك 

انت السر فى وجودى
بيك اصحى وانام واعيش
وانت القوة فى صمودى
والف ضربة متهزنيش

انت .. فرحى وبكايا
لو عنك يسألونى
الضحكة اللى ف شفايفى
والدمعة اللى ف عيونى

اسمع هقولك اية
مقدرش استغنى عنك
هفضل على طول بحبك
لو حتى زعلت منك

لو مهما عملت فيا
او مهما تكون بعيد
الصبر ليا هو
ان انت تكون سعيد

لو مهما البعد طال
انا هفضل فى انتظارك
فى قربك او فى بعدك
انا هفضل محتجالك

عبادة المال

الانسان لو ماله كتير
اى كلام هيقوله جميل
وديما كل افعاله صواب
حتى ان كان انسان شرير

والانسان من غير المال
كل كلامه لعب عيال
حتى ان كان بيقول امثال
وعنده امانة وعنده ضمير

فتلاقي كل طريق معكوس
والمزبوط ديما تعبان
وكل فسادنا اصله فلوس
من اول ما عبدها الانسان

لو هنعيش علشان المادة
وكل حياتنا تدور حواليها
يبقي خسرنا وبعنا حياتنا
وبكرة هنرجع نبكى عليها

عمال تشقي وعمال تكنز
وعمال تجمع .. جوعك زاد
عمال تبعد .. امتى هترجع
امتى هتعقل .. قولى يا واد 

غاية الحكمة تساعد غيرك
غاية الرحمة تنكر حالك
واشكر ربك وارضي ضميرك
عمر القيمة ماتبقي بمالك

افرح واشقي .. وعيش للغير
خلى قرارك .. هعمل خير
وف افعالك .. خلى جمالك
جوه القلب .... يسيب تأثير

الحياة بكل ما فيها

الحياة بكل ما فيها

لا تساوى لحظة الم

صدقونى ان قلت يوما

هى كأس علية مرغم

كم اشتقت للعدم

من قبل قبل الف عام

لم اكن جسدا بفم

غير مدرك للكلام

غير واعى للنصوص

غير مجبر باختيار

لا عدوا للصوص

لا اخاف الانهيار

لست اعلم فيها شيئا

لا يحير العقول

لست املك فيها شيئا

كل ما عندى فضول

حتى الجماد فيها تحجر

لم يعد يسمع نداء

حتى الجبال كلها

كادت تطير فى الهواء

احكموا انتم يا شعب

كيف بالاحزان اشعر

ان لم يكن لدى قلب

احكموا انتم يا شعب 

 

ملحوظة:
الصورة لنازحين عراقيين

 

الدم على الرصيف سايل

والدم على الرصيف سايل

يا عالم تعالو بصو الحقونى

حال بلدنا يا خلق مايل

ودا جاى يقولى نور عيونى

فا متلاقيش غير الكلام

ولسة حق الناس مجاش

وكل ما اجى اصرخ حرام

الناس تحوشنى وتقول بلاش

مش هنعيدو م الاول

اخوك فى مرة فكر يقول

ولسة ما جاش من عمنول

مش هنعيدو من الاول

ولا عايزين ترجع حقوق

كل زعيم راح يتحول

بس ادولو فرضة يسوق

بينى وبينك

بينى وبينك كلمتين 

جوه ورقة مقطعة

وطلعت فى الاخر حمار 

بس ناقصة البردعة

يعنى م الاخر عويل 

شخص عاش مضحوك عليه

لجاء اليكى يتحامى فيكى 

وانتى اللى كنت بتسلميه

                                                 

ياريت دموعى كانت تجيبك

وياريتها الدموع كانت تجيبك

كنت ابكيلك بدالها دم

لكن حبيبتى انا راح اسيبك

ومسيرها الجراح تتلم

ومسيرى فى يوم هتعود

ومش هيفرق شئ معايا

لو كان غيابك راح يطول

ولا تقوليلى ان انتى جاية

ومش هحس دموع على خدى

هعتبرها حبات مطر

مش هتفرق حاجة عندى

علشان طريقنا ديما سفر

اخدنا اية غير الوجع

قولنا اية غير الوداع

عرفنا اية غير الندم

وكسبنا اية غير الضياع

اخدنا اية من بعدنا

قربنا امتى لبعضنا

امتى تبتنا فى ايدينا

علشان نخاف على حبنا

قررنا امتى فى يوم نعيش

قوليلى امتى وقفتى جنبى

قلتيلى امتى متسبنيش

وامتى قلبك حس بقلبى ؟!

منلومش حد .. اللوم علينا

احنا اللى دورنا يا حبيبتى سلبي

مفيش اى خوف علينا

لو كنتى فعلا عايزة تحبى

انتى رافضة تعيشي جنبي

وخايفة النهاية تكون سعيدة

مش عايزة تخلص الرواية

علشان كدا ديما بعيدة

عايزة تزود فى الدراما

تعمل حبكة فى الحوار

ومشهد رجوعنا بالسلامة

مش عايزة تاخد فيه قرار

وتخترع مليون حكاية

علشان بتهرب مـ النهاية

وكل ما نقرب لبعض

نلاقينا نرجع للبداية

هى دى كل الحكاية

ارجع لعقلك

ارجع لعقلك وفكر ثواني

وبلاش تعود للغربة تاني

بلاش تغيب عن حضن بيتك

مرعوبة خايفة لا تنساني

كام ليلة تعدي وانا وحدي

هو انا ايه ؟ لازم اعاندك ؟

وفكرة تجيب وفكرة تودي

وانت هناك عايش لوحدك

قولي ازاي هقدر اطمن

وانا اساسا مش وياك

انا حقيقي ممكن اتجنن

اعقل كيف وانا مش شيفاك

انا مليش غيرك يا حبيبي

وانا ضعيفة وانت عارفني

انا في غيابك سهل اموت

وانت كلامك بيخوفني

وان قررت خلاص هتسافر

سافر وعافر .. مش هنساك

خليك عارف وانت مسافر

انك واخد عمري معاك

انتى اجمل من جمالك

انتي اجمل من جمالك

فمتسأليش وتقولي حلوة ؟

ملوش لازمة اصلاً سؤالك

انتي احلي واحدة فيهم

وكل البنات منك تغير

عادي ان استغني عنهم

اما عنك ... مستحيل

فمتخافيش واطمني

ومتشغليش يا حبيبتي بالك

مقدرش اشوف او احبك غيرك

والسر اصلاً مش جمالك

انتي راحة ساكنة روحي

وانتي اعظم من طموحي

وانتي وضعك جوه قلبي

حاجة اعظم من خيالك

ايوة صعيدى

انا احب 

الرقص البلدي

ضرب الطبلة والمزمار

ايوا صعيدي بجد يا ولدي

بس ماحبش ضرب النار

ايوا صعيدي 

واحب الضحك

وممكن انكت يوم علي حالي

اصل انا دوغري مليش ف العك

وعمري ماكشر مهما جرالي

سؤال عـ الهامش

سؤال ع الهامش:

هو ليه حبك بدع ؟

وقلبك اصيل وشهم وجدع ؟ !

وليه الحقيقة غير الرواية

وعينيكي صادقة زي المراية

وليه القسمة مبتقبلش

وليه الحلو مبيكملش

وليه الكذب يتصدق

وليه الصدق متصدقش

وليه كوابيسنا تتحقق

واجمل حلم متحققش

ولسه العقل بيعايش

واديه عايش

واقول تتعاش

ورامي سؤالي ع الهامش

وبتعايش

معقدهاش ؟!

النبؤة

والنبوة بالحرف تمت 

والغنيمة وزعوها

واخدو منى كل حاجة 

حتى هدومى قطعوها

والشعب ماشى عمال يسقف 

على كل حاجة بيعملوها 

شعب طيب ايش هيعرف 

فـ النجاسة اللى يقولوها

صدقنى يا واد صدقنى

صدقنى ياواد صدقنى ...

انا فعلاً والله نسيتك

مش فاكرة ياواد صدقنى

ان كنت فــ يوم حبيتك

وامانه يا شيخ تعتقنى

وامشي يعمرلك بيتك

حدش قالك تعشقنى

وانسانى مادمت نسيتك

مقدرش ادوب فـ هواك

ولا عايزه اكون مشتاقة

انا اصلاً مش حساك

مش فارق عندى فـ حاجة

ما تبص ياواد حواليك

انا اصلاً مش شيفاك

الغلطة اكيد فــ عنيك

مش عايشة غير جواك

كان جرحك ... ولا علاجك

اعملك حاجة... تفيدك

جيتلى .. بشوقك ومزاجك

حدش ضربك على ايدك

اعصابك ايه "تلاجة"

مش غصب اعيش وياك

حدش غصبك على حاجة

كله بكيفك وهواك

لا انا الكافر ولا المؤمن

لا انا الكافر ولا المؤمن ..

انا المطحون ما بين الاتنين

معاك الحق .. اقول يمكن ..

منيش عارف اصدق مين

لا انا موافق ولا معارض

ولا صوتى امانه " لحد "

انا حايلا .. طير شادر

لا اعشق سما 

ولا اعادى الارض

 

منيش ويــاك ولا ضدك ..

ولا بشمت فـ يوم عرضك

لكن تعالا .. هنــا قولى ..

ازاى رضيــت تبيع ارضك

ليه الوطن ماهوش هامك !!

وفتحت دارك للخسيس

ورايح .. تبيع شرف امك ..

علشان كرسى ..

وعلشان رئيس

خليتنى اصدق ان انت فعلاً

خاين وكاذب ..قاتل وسارق

وانك حقيقى فعلاً ... وقولاً

عايش تتاجـــر .. بالمبادىء

انتى اغلى ما فـ حياتى

انتى اغلى ما فــ حياتى

انتى حب وفرح اتى

انتى اجمل شىء حصلى

وانتى اعظم امنياتى

معرفش اية عاجبنى فيكى

بحرشعــرك ولا موج عنيكى

ولا الفواكة اللى فــ شفايفك

ولا النعومة اللى فــ ايدكى

قلبى شافك عاش فى راحة

وقلبى حبك وبصراحة

كل بنت شايفها صحراء

وشايفك انتى احلى واحة

انتى حلمى بــ الخلود

وانتى حسى بالوجود

انتى روحى وعايشة فيــا

وانتى فيـــا ملكيش حدود

هجدد الفكر القديم

يا حبيبتى لانى شفتك

انا هكون انسان عظيم

اكيد حبيبتى عشان عرفتك

فـ بلاش تقولى هحب بعدك

عشان حبيبتى ده حلم بعدك

و بلاش تقولى ابعد ساعدينى

عشان حقيقى مقدرش اساعدك

انساكى شىء ماهوش بايدى

اهواكى شىء ماهوش بايدى

سواء قبلتى او رفضتى

انتى اللى بتجرى فى وريدى

انتى مش للذكريات

ولا وهم وماضى فات

انتى حب هيعيش حبيبتى
 حتى لو بعد الممات

باختصار

باختصـــار

الليل كمالة لــ النهــار

والحلو عمره ما يبقى حلو

لو مفيش .. طعم المرار

والوقفة تبقى صح وقفة

من شعب عاش .. الانكسار

بأختــصار

ياريتها قالت مبحبكش

ياريتها قالت مبحبكش

ياريتها قالت مش عيزاك

انا قلبى اصبح ميخصكش

وخرجنى حالاً من جــواك

بالعكس قالت استنـــانى

وايــاك حبيبى فــ يوم تنسـانى

غصب عنى .. شويــة هغيب

وانــا وعــد منــى "هرجع تانى"

انت عايش جوه منى

وانا عارفه انى " بعيش جـواك

انت حبيبى وحتة منى

ازاى حبيبى تقــول هنســاك ؟!!

ياريتها قالت مبحبكش

ياريتها قالت مش عيزاك