زى قشة

زى قشة فى اى عشة
زى مية جوه بير
زى طلقة يا خلق طايشة
بس مش لاقيه القتيل

لا زمانى لا مكانى
ولا اى شيء فيا اختلف
فى الحياة عمال بعانى
وبرضو مش لاقى الهدف

نفسى اعرف بس دورى
نفسى يترجم حضورى
نفسى مرة الاقى نفسى
ولا حبت حد غيرى ؟!

ايوة حلوة الدنيا فعلا
اكيد جميلة
بس فيها الراحة كلمة
مستحيلة

وان بكرة مش بييجى
وان رفضى مش حقيقى
وان الفرح كان اختيارى
بس مش عارف طريقى

عندى ارض مليانه مية
وعندى خير
وبالخيال من غير جناح
بعرف اطير

بس لية بيكتفونا
والتراب بيسف فونا
ولو نطقنا باى كلمة
فى القسم يطلع دين ابونا 

وحتى الدنيا خايفة تضحك
والشجر خايف يميل
والبشر ماشية بهمومها
زى نملة شايلة فيل 

الطفولة خلف شيش
خايفه يلمحها الشاويش
لما تغفل فجأة تصرخ
لا ياباشا الواد مفيش

ايوا عندى ولسة عندى
وهيبقى عندى يا واد كتير
كات تمشيك الغريزة
وانا كنت افكر فى الضمير

لا احب يكسر عينى حد
ولا احب يبقى عليا دين
ولا ليا فى شغل الشحاتة
اموت .. ولا امد الايدين

بس حظى حكومة ناقصة
كل فترة وليها رقصة
كسبو مصر فى المناقصة
ولعبو بيها الم ...كين