روحانيات

السبت، 23 يونيو 2018

سماهر

سماهر
والقلب زى النسيم طاهر
لو تاخد الروح تاخدها
واللهى تستاهل 

ماتقولوا يا ناس طريقة ؟ 
ارضيها بس كيف
فى قلبي هتعيش اميرة 

والكل راح يبقي ضيف

مقدرتش احتويها
ولا حتى احس بيها
كل همومها تداريها 

ماتبين اى شئ

بتبعد من سكات
زى كل البنات
متبصش ع اللى فات

وبتمشي ف الطريق 

خطواتها تملى ثابتة
مغفرتش ليا غلطة
وتقولى دا كان زمان


زى رئيس الملايكة
دخلت فى نقطة شايكة
من غلطة بقيت شيطان


ياريتها تكون بتوبة 
وندم ودمع ودماء
ياريتها تكون بصلوة

وسيرة بس حلوة
ممكن يحصل شفاء 


لكل نفوس جريحة
بقلوب صافية ومريحة
تقدر تغفر وتخضع
لعدالة السماء 


لأن بـ بساطة يعنى
قلبي الطيب خدعنى 
وخلانى اروح لناس 

لا عرفت كلمة حلوة 

ولا سمعت مرة غنوة 
للست من الاساس 

خلونى بقيت ممزق
وروحى فى كل جانب
ومبقتش مؤمن وواثق

فى محبة الحبايب

لبستنى روح غريبة
بشتاق لناس غايبين
مبقتش ابوح وافضفض 

ولا حتى بقول يا مين ؟

عطشان ولا حاجة تروى
ولا مية تبل ريق
وفراغ القلب يكوى 

والكون عمال يضيق 

وكل ما اقول هتضحك 
فى السكة يغيب صديق
ماشي معلق طموحى 

وحماسي جوه روحى 
واحساسي مش برئ 

روحى بتئن فيا 
تحت قيود الهوية 
والمود اسود كئيب 

ونست ياما ناس

وسندت ياما ناس
اخرتها ادونى كاس 

وفاتونى على الصليب 

الوحدة مش فردية 
الغربة احساس جماعى
واوجاعنا البشرية  

عايزة العمل الجماعى 

ف لو كنتى يا دنيا بحر
راح اكون مرسي ومينا
والمركب مش هتغرق 

علشان فى ايدين امينة

ومهما عملتى فيا 
او مهما سويتى
سماهر انتى فى عنيا 

لو رحتى او جيتى 

لو مهما شرقتى
او مهما غربتى
حبك هيكون فى قلبي

بيتى ومصطبتى



الأحد، 29 أبريل 2018

مش عارف لية

مش عارف لية؟ كل ما شوفك
كأنى بشوفك من اول وجديد
نفس النظرة نفس المسة
نفس الهمسة والتنهيد
نفس الشوق ونفس اللهفة
ونفس طعم السلام فى الايد
ايوة بحبك وانتى عارفة
بس كأنى بحب جديد

قلبي يفرح ومن الفرحة
بحسه بيخبط فى ضلوعى
مانتى الغاية وانتى الرحلة
و انتى خلاصة موضوعى

وانتى المكسب والغنيمة
وكل حكاويا القديمة
الشمس اللى بتنور حياتى
والشئ اللى عملى قيمة

فمسحى دموعك فى كفي
وسامحينى على 

ضعفي الهزيل
طول عمرك كنتى فى صفي
وكنتى راضية بالقليل

وانا اللى كنت ديما بناكف
انسان مخالف
غاوى يعيش مشغول البال
لا هو فاهم ولا حتى عارف
ولا عمره بيبطل سؤال
عنك
وعن تفاصيل حياتك
وحكياتك
وعن ماضيكى وذكرياتك
واللى جالك واللى فاتك
وعن معنى واضح جوه عينك
لسة ضايع بين سكاتك

وانا كنت غاوى
العب بعمرى زى القمار
غاوى اللعب
وغاوى المقامرة
من صغرى كنت احب الرهان
واحب نكهة المغامرة

افرد شراعى للرياح
واركب البحر المهول
واسرق نت من التتار
وابيع طواقى للمغول

طارت سنينى زى البخار
فى الهوا اتلاشت
والفرحة ملحقتش اشوفها
لما هناك لاحت

يا جنة بعيدة عنا
وفى بعدنا ارتاحت
يا نسيم بيعدى جنبى
فيك ريحة العبير فاحت

ياللى روحى عليكى طالعة
حرام طلوع روحى
يا وردة فى قلبى طالعة
وجوايا بتفوحى

عجز الفراعنة والرومان
عن فك اسرارك
وفيكى الفلاسفة اتكلموا
واتبادلوا اخبارك

انتى حضورك كان تجلى
وفى الحفلة انا الدرويش
ليل نهار هايم فى حبك
حبك عبادة واكل عيش

يا ريحة من بيتنا القديم
سحر الطبيعة بتاع زمان
شبة حكاوى الف ليلة
فيكى يحلو الكلام

يا حلوتى يا جنتى
يا سقطتى الاولى
عن كل حاجة فى دنيتى
انتى اللى مسؤلة

لا لومت همى ولا شكيته

لا لومت همى ولا شكيته
ولا حتى جوايا داريته
فضلت ماشي مع الايام
عشقت همى وحبيته

لا بتلوى ولا بتذمر
ولا بقول اشمعنى ولية
بحاول انى اكون مثمر
فى اى وضع اتحط انا فيه 


زى العنب اللى اتخمر
زى البلح اللى اتمر
اصبح سر من الاسرار
لما اتقلب جوه النار


عندى ايمان بجمال الكون
يحلى ايامى الجاية
يدى حياتى طعم ولون
يقوى ركبى المرخية 


بنام واقوم وانا مطمن
ومن جوايا بعيش فى سلام
وكل يوم انا بتعلم ..
وباخد درس من الايام 


نهر الفرحة وقلبي شطوط
والمحبة فيه بتفيض
طول منا راضى هعيش مبسوط
روحى بترفرف قلبي سعيد


الاثنين، 8 يناير 2018

الحلوة لما بتدلع

الحلوة لما بتدلع
قلبي يولع
وافضل كدا
مش على بعضي
طب ما تقولى لى
على فين اهرب
انا مستغرب
من فرحتى لما تعدى
انا قلبي يطير لو يلمحها
وعينى تعشق ملامحها
دنا كل همى افرحها
وهى اغلى الناس عندى