روحانيات

الأربعاء، 22 نوفمبر 2017

عصفور

الدنيا لما تضحلك
وتختفي كل مشاكلك
وتبقي واضح فى الصورة
جوه المراية المسحورة
والفرحة تاخدك بالاحضان
وتختفي كل الاحزان
وتلتقي بكل حبايبك
ولما تضحك من قلبك
يبقي اكيد منتاش ع الارض
لا فيه مساحة ولا طول ولا عرض
يبقي انتهى عصر الاحلام
لا فيه صحافة ولا فية اعلام
فى الجنة وحدك تتمتع
من غير حروب هتعيش فى سلام
هتكون فراشة فى غيطان برسيم
تمشي سعيد عمال تضحك
ومفيش فى جيبك ولا مليم
يبقي انتهى عصر العملة
والخير يجيلك بالجملة
وتقول كلامك بالمقلوب
ولا فيه زعل ولا كسر قلوب
ولا العشم يسرق عمرك
زى الحصان فى سباق مجنون
وحدك كدا يابو قلب حنون
عمال تدافع عن حلمك
عمال تشرق وتغرب
قولى كدا على فين تهرب
ماهو انت طمعك مش فى بالمال
ولا فى حياة الرفاهية
حلمك تحقق كل كمال
وتعيش حياة المثالية
وحدك كدا بتطوف وتدور
وعمال تدن دن يا عصفور
طابور طويل راح يوم يخلص
ياخد سنين او حتى شهور
امسك فى حلمك يا عصفور


همسك ايدك

همسك ايدك وامشي معاك
ومهما هشوف هقدر اتحمل
عمرى ما خاف طول منا وياك
طول منا ماشي معاك .. مطمن 

مهما خريف عمرى ينشفنى
ولا سنينى تبقي عجاف
هفضل احبك .. مانت عارفنى
طول منا جنبك عمرى م خاف

قلبي فى صدرى عمال يرقص
من الفرحة اللى انا عايش فيها
ماشي الرحلة ... وعمال بضحك
اصلك انت اللى محليها

كل حياتى واهتماماتى
وكل امورى اللى مخبيها
كل حاجاتى واحتياجاتى
وحدك انت الاعلم بيها

فاطمة

فاطمة
اول وتانى ..
لو حتى الشعر شاب
يا حبي الاولانى ..
يا عشقي للعذاب

يا رسمة فى لوحة بيضة ..
سبحانة من ابدعك
يا حلوة فى شكلك وطبعك ..
حقيقي ... ما اروعك


الضحكة بغمزات ..
وخدودك تفاحات ..
وشروقك كان دفا


وكلامك اغنيات ..
وسكوتك تسبيحات ..
وجهلك معرفة 


بكلمة بتنصفينى ..
وبنظرة بتعرفينى ..
من غير م انطق كلام 


انا جايلك اشتكيلك ..
وبقولك انتى فينك ..
وارمى عليكى السلام



الخميس، 30 مارس 2017

رجال الطين


لية يابونا لية يا شيخنا
لية تزيف لية تاريخنا
لية تملى تقول كلام
مــ اللى بيشقلب نافوخنا

لية تقولوا على الحضارة
شوية حجارة
لية حياتنا وحكايتنا
تصبح تجارة

فين تاريخنا
فين لسانا
فين ثقافتنا فـ كلامنا
لما يبقى الحال كدا
يبقى اية فايدة علامنا ؟

بالتطبع فى اللغة
وفى الثقافة والهوية
واحدة واحدة الشعب هيفقد الانتماء
والولاء
والمسؤلية

علمتونا بالتعود والتطبع
حاجات غريبة عننا
نسيتونا ان احنا واحد
مهما اتغير شكلنا

نسيتونا معنى التسامح
والتراحم والايخاء
اقنعتونا ان التقدم
ممكن يحصل بالدعاء

اى حاجة وحشة تحصل
يبقى اسمه ابتلاء
كان فساد ولا جريمة
او حد يحكمنا بغباء
ابتلاء

مش مهم نبنى مدارس
التعليم اصلا حرام
قول كنايس قول جوامع
احنا مش ناقصين علام

اهم شى دور العبادة
اهم حاجة رجال الدين
احنا مش عايزين دكاترة
وخلق شاطرة متعلمين

ارموا الدكاترة والدواء
خلاص هنشرب بول ابل
خلاص بشفاعة قديس ميت
كل الدعاوى هتتقبل

لية كل واحد فيكو شايف نفسة صح
اما باقى الناس غلط
لية كل واحد فيكو شايف نفسة ماس
اما باقى الناس زلط

لية تخلوا الكون جحيم
لية بتاخدو الدين ستار
وتقولوا مين هيخش جنة
وتقولوا مين هيخش نار

لية الفكر عندك تطرف
لية ميولك اجرامية
لية الوعى عندك تخلف
وانت كلك مفهومية

لية بتخافوا من التجديد
لية بتخافوا من الحداثة
مش فالحين غير فى التهديد
والعب فى الدين والسياسة

هتفيد باية حتة قماشة
هتفيد باية شوية مظاهر
سبحة .. دقن .. وجلابية
لو مكنش الفكر طاهر

نعرف اية عن ابن سينا
والفارابى وابن رشد
نعرف اية عن الفنون
والقانون وحقوق الفرد

نعرف اية عن الفيوم
نعرف اية عــ البهنسة
نعرف اية عن العلوم
والعمارة والهندسة

يا كهنة كل عصر
يا لعنة كل جيل
ازاى بتمشوا فى الجنازة
وانتوا قاتلين القتيل

يا مقوقس يا مخلص
بعتنا ليهم بكام
احكى لينا يا بنيامين
عــ الرعب ساعة الاقتحام

ولما عمرو قال للمقوقس
بينا وبينكم ثلاث خصال
مش هنسيب ارض العنب
مش هنعود ارض الرمال

احكلنا يا عقبة بن عامر
مين ضربكم بـ النبل ؟
مين اللى رغم ضعف عدده
قدام سيوفكم مات بطل ؟

احكلنا عن صوت الخيل
وعن كفاح اهل النوبة
وهروبنا فى سواد الليل
وسقوط بلدنا المحبوبة

احكى لينا .. يا مغيث
عملوا اية .. فيك البشامرة
وازاى وقف .. عبدوس الفهرى
ضد الافشنة ... والجبابرة

ضد كل شخص ساعى
او متداعى
سليط
ضد كل ولاد الافاعى
اللى خطط واللى نفذ
والوسيط

مبروك عليكم الغنيمة
والغنايم والسبايا
واكل العسل بالمعلقة
وقت تقسيم الهدايا

بين الوالى .. والخليفة
الغنايم ... فيفتى فيفتى
مش محتاج يعنى فتوة
مش محتاجة حد يفتى

احنا شعوب بتحب الارض
صناع حضارة بتوع تاريخ
وانت تصلى الفرض بفرض
انت المؤمن واحنا السيخ

شعبنا طول عمره صابر
راضى بالقسمة والمكتوب
فــ ياريت تطمن الخليفة
على صحة البقرة الحلوب

كات جزية او ذكاة
كان خراج ولا مكوس
همكم بس الدهب
والجوارى .. والفلوس

شغلانتكم شيل السلاح
اكل عيشكم قطاع طــريق
انتوا شاطرين فى الدمار
والحصار بالمنجنيق

فـ يا بلاد الصمت ثورى
قولى لأه والف لااه
وارفضى بلاد الفراعنـة
تبقى طرطة للغـزاة

تبقى ملهى للحفاة
تبقى نـادى للعراة
الزعيم واكبر حرامى
يبقى الـ حاكم بأمر الله

يا امرينا بالمعروف
يا نهينا عـ المنكر
اللعب اصبح عـ المكشوف
ما بين شيبوب وبين عنتر

و فاكرينى يعنى هصدقكم
وانتوا شوية كذابين
مش عايزين غير مصلحتكم
وعرق الغلابة الشقيانين

اهم من طاعة الأله
طاعة الولاة والسالطين
الجنينة ملك العصابة
والخرابة ..للشحاتين

علشان ولائكم للحكام
بتخلوا الحكم يطيب ليهم
باشارة يتمنع الكلام
وتكفروا اللى يثور عليهم

اطيعوا الله ورسوله
واولى الامر منكم
دول اللى عاجنينكم
دول اللى خابزينكم

ولحد امتى هفضل اقول
ولحد امتى
هفضل افهمكم

دول عارفين الخير والشر
اية اللى ينفع واية اللى يضر
وطول ما انت عايش فى حالك
انت حر

الحكومة وخلاص عرفنا
بكيفها تبيعنا وتشترينا
هى حمل وفوق كتافنا
ولا عمرها هتحس بينا

تفرق اية الهرطقة عن زندقة
اهى كلها اشكال كتير للتفرقة
اهى كلها اسماء تهم
تلف حبل المشنقة
اهى كلها اسباب كتيرة
غرضها بس الزحلقة

يابونا طيب بالهداوة
ياشيخنا اسمع وبلاش شقاوة
مفيش فرق بينا وبينكم
عند الله الكل هيتساوى

عند الله محناش عبيد
ومعيشنا عبيد ليكم
ربنا خلق الناس احرار
جنة ونار مهش بايديكم

ملاك الخلق وعقولهم
بقت خلاص كما ابليس
يغشوا الشعب فاوعولهم
ان كان شيخ ولا قسيس

دور كلامهم ديما فى مخك
وبلاش تكون تابع لحد
خليك تملى ديما محايد
لا تبقى مع ولا تبقى ضد

اعمل طريقك اصنع حياتك
انزل وخوض كل التجارب
خليك تملى واثق فى ذاتك
انشالة لو .. وحدك تحارب

اياك تفكر فى الهروب
اياك تفكر فى التراجع
الحياة غالب .. مغلوب
فى النهاية لازم تصارع

لازم تزرع لازم تقلع
لازم تعافر لازم تحاول
مش بتبقى بس تبنى
زى ما يقول المقاول

على الارض قبل متسافر
لازم تسيب بصمة ايديك
دى الشمس بتفوت القمر
لاجل ماينور عليك



الأربعاء، 1 مارس 2017

مبحبكيش

منتيش حبيبتى ولا حتى كنتى
انا اصلا مبحبش حد
فـ سيبك بقا مــ القال والقيل
وخلينا نتكلم جد
 

انتي هانم وانا من العامة اكون
وانتي عارف ظروفنا صعبه
وبلدنا غرقانه ف ديون
عيزاني لية وازاى .. احبك ؟!
 

احبك كيف انا مش عارف ؟
انا ابن ... ابن العدمية
وانتى الخيال .. بنت التفاؤل
عايشة فى علاقة خيالية
 

لا عمرى خبيتك فى قلبي
ولا قلبى اصلا كان لوكاندة
ولا كنت بفرح وانتى جنبى
انتى الحكومة .. وانا المعارضة
 

مكنش بيتك جوه حضنى
ومكنش فيه بينا حكايات
ولا خدك اتشوك بدقنى
فــ بلاش نقلب فـ اللى فات
 

ولا كنت اضفرلك فى شعرك
وابدر فى ليل شعرك نجوم
ولا كنت انام واغفى فى حضنك
وعليكى اصبح كل يوم
 

ولا كنت بسكر من شفايفك
ولما تشوفينى تيجى تجرى
ولا كنت بشرب من ريقك
وانتى قاعدة جوة حجرى
 

فـ بلاش تعيدى
وبلاش تزيدى
وبلاش نزودها صعوبة
مهيش غريبة
لو تمطر عز طوبة
ومهيش غريبة
فى الشتاء نحس برطوبة
 

شئ طبيعى فى الالم
نهوى الدموع
ولما نطول فى البعاد
ننسي الرجوع
 

والهجر يستدعى الجفا
والجفا يهوى الخصام
واللى ناوى يبيع يبيع
مش فارقة يعنى يبيع بكام
 

و مش هقولك شئ جديد
معدش ليه لازمة الكلام
دا الـ بليد يفضل بليد
مش هينفع فية علام
 

فــ متقوليش اية العمل
وبلاش نصغر فى الجبل
ياما حاولنا
وغيرنا حاول
وهى هى مفيش امل
 

فـ لو مرة قلت انى بحبك
وانى من غيرك معرفش اعيش
وانك حلمى من الطفولة
وانى ... وانى ... متصدقيش
 
 
متصدقيش الذكريات ولا الاماكن
ولا كل قهوة قعدنا فيها
انا جوه قلبك كنت ساكن
والمساكن هدتيها
 
 
مفيش شئ يربطنى بيكى
كل الحبال اتقطعت
ومفيش سكة تودى ليكى
كل المراكب ولعت
 
 
وبلاش نحكي عن اللى كان
بعد ما هانت العشرة
في ناس بتكون دهب صافي
وناس بتكون دهب قشرة
 

فــ بلاش نفكر فى اللى فات
وبلاش نحولها لــ درامـــا
بينى وبينك بلاد وبلاد
لحد ما تقوم القيامة

الأحد، 5 فبراير 2017

اكتئاب

التحمل والتجمل
الصمت ويا التأمل 

عشق فلسفة السكوت 
طعم الدفا جوه البيوت
تفاصيل حياتنا وحكايتنا 
زى سمكة فى بطن حوت
والتفلسف والتقشف
والتوحد والتصوف
كلها كانت فضائل
حافظوا ع العقل اللى فاضل
من الاندفاع وسط القطيع
من تأقلم واندماج
داخل الوضع الفظيع
لنقسام فى النواة
وتجارب للهواة
كون غريق عمال يدور
على دافع للنجاة
والجمهور عمال يسقف
والكواكب تستجير
وانا وحبيبتى برة المجرة
زى الفراش عمال يطير
المعادلة فى المبادلة
فى المشاركة فى السؤال
يبقي ديما فى مجادلة
يبقي فى الف احتمال
لما نقبل التنوع
من تعدد واختلاف
لما نرفض التجمد
والتخلف والخلاف
لما نلقي فى يوم اجابة ..
لما تتحل القضية
لما نلقي فى يوم نهاية ..
للرواية الهزلية
من صراع لصراع
بين اسباب الوجود
من تردد و اندفاع
بين اثقال القيود
العقل اتقن فن الخطاب
روحى عايشة فى اغتراب
والجسد عمال يعافر
بين المتعة والعقاب
والامل يا خلق سافر
واللى فاضل
اكتئاب