تريز اسكندر

انتى صورة مـ الآله
سر اسرار الحياة

ساكنة قلبى وشاغلة عقلى
وعدى حبك منتهاه

أحس انى ساكنة فيا
كأن روحى وحاسة بيا

مهما انسى وابعد واغيب
بلاقيها هى تسأل عليا

بقلب يشفق عـ الغلابة
منبع ومصدر لـ طيابة

تعرفش هى غير تضحى
مهما تقسى وتبقى غابة

تلاقيها أم مع اليتيم
ماشية تعالج فـ الـ لئيم

على طول تعالج اخطاء حياتنا
وكأن هى موسى الكليم

فاكرها لما كانت تقول
حاول وجرب .. اصبر تنول

انا واثقة فيك انك هتقدر
امسك فى حلمك .. صحى الفضول

تشبه طبيبة بقلب طيب
ديماً تداوى ديماً تطيب

تخلى قلبك ديماً شباب
مهما شعر الراس يشيشب

حبيبتى هى بدون خلاف
هو اللى سامع زى اللى شاف ؟

انا اللى لامس قلب روحها
مركبها ماشية بدون مجداف

يالى طعمك على طول لذيذ
سالت عنك .. قالو تريز

امانة ابقى افتكرينى 
لما ابقى صورة فـ البراويز

قلبــى ميــلزمنيش

يادى حظى الدكر.. حتى قلبى مخاصمنى
كل ما يشوفنى يسكت ..ويمشى ولا يكلمنى

ويقولى الله يسامحك .. طول عمرك ظالمنى؟
من نظره كنت فاهمك وبالكلام منتاش فاهمنى

كل ده لية ......عشان بقوله عوفها
وبلاش تقول يا قلبى....."ابوس ايدك اشوفها"

وبلاش تيجى فـ خيالك ...ولا حتى تقول حروفها
وكل ما اقوله حاجة ....يقول سيبها لظروفها

قلبى على طول فايتنى..... وماشى بيتسول
و بيشحــت  الضحكة ....ومبقيشى كــ الاول

ويرجع عشان يسأل...  سؤاله مـ الاول
هو الحبيب راجع؟ ... ولا لــسـه هيطول؟

كل ده لية ... عشان بقوله  فارق
حبيب نسيك وباعك...  وسابك وسط المفارق

وانسى الحب لما .. يولى  ويفارق
وبلاش تقولى كلمة..... "معدش شىء فارق"

قلبى عايش بـيسرح .... ويـبـيـع توك البنات
ع الارض ...فـ المترو ... وجوه العربيات

بيطوف   دايخ  .. بينهج ..ويبيع ... بس فـ سكات
والمتعة عنده يسرح... .. ويفكر فـ اللى فات

 واول مايشوف صورتهــا....  يبـكــى ويتـنـطـط
ويسح فى دموعـــه..... وعـ الارض يتـفـرفــط

ويمسك طينه فــ ايديــــه..... وفـ وشـه بيمرمط
وعايز يمسك شرايينه..... يقطــعها بالمشــرط

ماشى على طول مدروش .. ومصاحب الدراويش 
قلبى مبقيش بيروش ...ومخـــاصم الــترويش


الحزن فى صدره عايش .. مسحوب من الغناشيش

اقول لــ قلبى أضحك
  يبص يتريق     
ويقولى مبيديش   

عندى يــا ناس سؤال ....معلــش هيلخـــبــــط
محتاج منكم اجابــــة... من غير ما حد يغلــط

قلبى مغـــرم صبابه ...فى العشق مـا يفرط
ولا قلبى  ابن كلب  .... عايــــش ..  بيتـشرمـ*

خــــــيوط الـــــوهم

 بمسك خيوط الوهم وارسم شبه سكة
وامسك فانوس سحرى واحكة 100 حكة

ويفضل ساعات قلبى سرحــان على الدكة
على حب ضاع منه ومفاضلشى غير فكة

والف واتشقلب ...واعملى كام حـــركة
فى عواطفى بتقلب واهى ماشية بالبركة

تعدل ولا تقلب.. انا حزنى صار ماركة
فـ الحزن عاش قلبى .. فاتحلة كام شركة

......

عايش شهور تايه وعايش سنين محــتـار
تايه ومش عارف مقطوعة لية الاخبـــار

والف واتحـــــــزم واعملى حفلــة زار
واتم تم .. واعزم على خلطة مـ العطار

.....

واعمل حاجات هبله لا تضر ولا تنفع
وارجع واقول جايز ماهو بس اية يمنع

ولا انت مش عايز الحب ليك يرجع
خليك عاشق هادى واحفظ كده وسمع

.......

وافتح كتاب السحر وافتـــش المكتــــوب
واعملى كام تعويذة مكتوبة بالمقــــــلوب

وانــادى عـ الارواح تحضــــــر المطلوب
واعمل عروسة ورق وارسم حروف بالطوب

.......

واقراء فـ كتاب اسمه اسرار جلب الحبيب
واقول كلام خايب على بصــله ويـا حلــيب

واكتب الورد كامل على شكل الصليب
وتخطى عليا حامل قبل القمر ما يغيب
.....

واقعد ساعات أأمر يحضر ملوك الجان
بحتة مـ التوراة
وحتة مـ الانجيل
وحتة مـ القران

.....

واروح ازور ستى تفسر الفنجان
تقولى يا حزنى مالك يا واد عدمان

العشق يا ستى بياكل الجتة
والفكر قطعنى وخلانى 100 حتة

حبيبتى يا ستى تمشى ولا تقوليش
والبعد يا ستى قاتل ولا بيديش

مـ الدمع يا ستى عينى بقت شيش بيش
ومـ الحزن ياستى الصحة حتى مفيش

واكلم قلبى واقنع فيه
يبصلى ويرمش
واقوله ياض انسى فى اية؟
يقولى فـ المشمش

........

الناس تشوفنى تقول ...خليك عاشق جدع
بلاش تعيش مخبول... وتوشوش فـ الودع

بلاش تعيش فـ الحلم وتهرب من الواقــع
حاول كده تنسى وتقاوم فـــ البـــــــــــدع

........

حاسس يا ناس قلبى عايش بعيد عنى
لا بــقيــت انا فاهمة ولا هوه  فاهمنى

سيبونى اعيش اشرب فى حاجات تبهدلنى
جايز فى يوم اقدر وانسى اللى ساكنى

......

وعمال اجيب فـ اصناف تقسى وتنسى
ومعرفشى لية الخطاف مبقاشى بيرسى

وماشى خلف خلاف وبقسى على نفسى
والعمر كله عجاف ويومى شبه امسى

......

شكلة مفيش فايدة فى ذكرى محفورة
بالسحرعـ الجدران
مهيش حجات تبهت ولاحتى كام صورة
تحرقها بــالنيران

......

عايز حبيبتى اعرف وافهم اية تفسيرك
فى حاجات كانت تحصل وتقولها فناجيلك

قوليـــلى يوم جايز يقنعــــنى تـبــريـرك
ولا انا مبجيش دلوقتى فى تفكيــــــــــرك

  

ورقــــة شـــجر

انا اللى كنت ساعة الربيع
ابن الجناين والبحور

زى القمر وشكلى بديع
وتملى بضحك فى سرور

انا اللى عشت فوق الشجر
وكنت اغنى لسنابل

وكنت اعوف ريحة المطر
وكنت اغازل فـ البلابل

رجعت ورقة عـ الرصيف
والريح تطيرنى بـ غرور

مبقتش اخفف حر صيف
ولا حتى انفع عود بخور

وانا قتلنى شوقى لمطر
وطعم الصحارى فى الصدور

انا كنت عامل فيها بطل
وكنت بحـــــلم بالحضور

اهو كل وقت وله ادان
ودلوقتى حان وقت الخريف

وهو ده حال الزمان
كنا حقيقة ودلوقتى ... طيف

وهو كاس عمال يدور 

اجمل جناين يخنقها بور

ولا فيها وردة ترجع تفتح
ولا تشم فيها ريحة العطور

ايوه صحيح ورقة فى شجر
لكنى روحى فى الجذور

ولو الجذور قتلها المطر
لــســه ملامحى فى البــذور

ايوة صحيح الهجر جارح
ومطرنا ديما بتاع مصالح

لكنى ديماً ارجع واقول..
جايز عطشنا يكون فـ الصالح

وادينى قاعد اقول لبذرى ..
حبة نصايح ..افهم يا فالح

بلاش تعيش تحلم بمية ..
مبقتش تروى.. وريقها مالح

قلب طايش

والله يا واد ولبست الخيشة
قلبك صاع وعشق درويـــــــشة

بكره حبيبتك تكوى حياتك
وتطلع غضبك فى الشـــــيشة

حب ياواد ماهو عصر الطيش
واصلك واد مدخلش الديـــــش

وانت صغير ... عقلك ناقص
ناسى فى حبك أكل العيـــش

بكره هتاخد بومبة فى حبك
وتيجى قفاك بيقمر عيــــش

تزرع همك تحصد غلبك
وتكره حتى طعم العيــــش

حب يا واد وارجع مغلوب
واهتش ....واحدف ناس بالطوب

شكلك ناوى يا واد تتجن
وشكلك غاوى تموت مصلوب

خلى واحدة تعلب بـــــيك
وتـدلـدل رجليـــها عليـــــــــك

انت صحيح منتاش متربى
وجاية خلاص واحدة تـــــربــيـك

اذكر قبل صياح الديك
انى ساعات عم اعلم فيك

وقلبك عاجبك يفضل جاهل
وعاجبك بنت تمـرمط فيـــــــــــك

بـــاكـو الـلـبـان

انا اللى قولت يا ناس زمان
انا اللى قولت صدقونى

ياريتنى اكون باكو لبان
وكـــل البنــــات يتلبــنونـــى

ادوق فى الشفة ويــا اللسان

وعلى صف لولى يطرقعـــونى

اشرب فى ريقهم خمر الحياة

وبدون كسوف يمصمصونى

أخرتها اية يا ناس كمان

أخرتها اية يا ناس شفونى

مهروس عـ الارض وعلى الحيطان

وكـــــــل الـبـنـات بـيـتـفـتـفـونـى

دعاء المغلوب

دعاء :
الدونيا لما تضيق
وتصبح كما العلبة
بصرخ بقلب غريق
وادارى فى الكعبة

وانادى يا ربى
يا ناصر العشاق
جايلك انا وزنبى
انى ضعيف مشتاق

جايلك وعشمان فيك
متردنيـــش يارب
اسمع دعايا اليك
واملا القلوب بالحب


القصيدة :

وازاى الوم الهوا
لما يبان جسمك
وانا شايفة زى اتكوا
وعاشق حروف اسمك

طاير ويتشاكل
فى الشعر بالجملة
و يقول دى مرسومة
فى البدء عـ العملة

شايفه هوا عيل
وضفايرة مطلوقة
عـ المية بيميل
ويوشوش الموجه

والموجه م الفرحة
تخبط فى بعضيها
ومفيشى ولا مركب
راضية ترسيها

وقاعد وحيد ازعق
عـ الموجة من قلبى
خايف يذيد غلبــى ــــ
لـمـا تـبلـيـهـا

يا طبيعة ما كفاية
هتعيدى وتذيدى
مدحك فى ورداية
مزروعة فى وريدى

دايب كده فيكى
من شعرك الــ راسك
وعاجبنى ما فيكى
حتى مرار كاسك

الرحمة يا سكر نـــبـــات
انا طالب الرحمة
بلاش تفارقى كـــا البنــــات
وتوهى فى الزحمة

بدون عنوان

يا بلاد يا بحر من الجليد ... معادتشى تعطف ع الغلابة
معدش فيكى شئ اكيد وخلاص عرفنا انك كذابة
...
يابلاد بتعبد فـ الاوثان .....يابلاد وجاهلة فى الكتابة
الكلب فينا مش اخوان .. ولا فــ رئيسنا مكر الديابة

 

حلم الفقير

كونى ليا انا الفقير نعمة جاية لوجة الله
وبلاش تقولى انى الامير وانك حيالا عايشة فى حماة

شىء مستحيل انى اكونلك او ان يكمل حلمـــنا
وعارفة هوايا مش راح يدوملك ومفيشى عشه تلمنا

ولا حمل دهبك ولا حمل تاجك ولا حمل خشبة جوه عاجك
جاية تقوليلى ده كفاية حبك خلاص يا ستى حبى بمزاجك

دعاء الكروان

بينى وبينك الفين مسافة فى حتة ابعد م البعيد
بصبر نفسى بالخرافة وبقول هتيجى فى يوم أكيد

بقول هتيجى ليا مطره تنسى قلبى طعم الجفاف
وتعود لى بيها حياتى سمنة بعد ما كانت عجاف

قالت هتيجى وهى صادقة وصليب وشايلة ع الكتاف
دانــــا نفسى منها بس نظرة او حتى تبعت تلغراف

عايش بدور وانده وانادى وكأن ضاعت منى هنادى
يا ناس حرام مهياش حبيبتى دا هى كانت من ولادى

 

شرع الكيال

مش بالمال ولا كتر رجال ده كل فولة وليها كيال
والعاشق ديماً للعاشقة حتى ان كانو لسه عيال
..
دوق الحب لاخر ندعة وانزل بيها قوام ف الترعة
واياك تنسى حب حياتك حتى ان شيخك قالك بدعة

حد الردة

لو كنت عارف امتى هموت

ويمل جوفى طعم القوت
انا كنت اشيل فى ايدى كفنى
واعمل لنفسى اجمل تابوت

دنا كنت اضمك وبشدة
وميهمنيش حد الردة
ولا كام رصاصة هتقتلنى
مدام فى طهرك هتوضى

دنا كنت أحبك ليل ونهار
ومصحاشى غير على ضرب النار
وافضل ع طول حاضن فيكى
واقفل بيبانى بــ100 مسمار

لو الغشيم يرضى عليا
أحسن ودينى يغمى عليا
هتحامى منه فى ليل شعرك
وازرع فى قلبة الحنية

 

يوم القيامة

نحن نقول في الصلاة على الراقدين

"لأنه ليس موت لعبيدك، بل هو انتقال".

(1كو 15: 55).

..

مين اللى قال ياعمنا
مين اللى قال
على موتنا لما يضمنا
يبقى انتقال ..
عشان ما نخسر بعضنا
بطل هزار
...
قال انتقال ..قال
طب فين العفش ؟
وفين العزال ؟
وفين الطبل والمزمار
وفين الضحكة العال العال
ولا ده كله كلام بطال

مين اللى قال ؟
لابد نفرح على اى حال
فى الفرح نفرح
وفى الحزن نفرح
وان احنا نقوى على الاحمال
مين اللى قال ؟

مين اللى قال ؟
لما نسيبهم ع القبور
ننسى السؤال

وانه حرام !!
تقعد شوية جنبهم
او تيجى دمعه فى حضنهم
ويحرم علينا اى حاجة
لو حاولنا نحسهم
وقال كفاية نحزن عليهم
مدام التراب هيضمهم


قال وقال
وقال وقال
والكل عزانا فى الدار
لكن جينا احنا وقلنا

بتقولو عشان عايم ع المية
وهنبكى عشان عايشين ف النار

وانا هبكى ياما
على خطاوى ف دربنا
سايبه علامة
على دمه لما كان بيفرفط
فى الشوارع زى الحمامة

ومع السلامة
مع السلامة ياللى ماشى
مع السلامة
ياللى سايب فرشتك
مع السلامة
ماشى وناسى غطوتك
مع السلامة

واه يا حبايب قلبنا
مش هنفتوكم
احنا شوية قليلة
ونحصلوكم
هتوحشونا ياما
وربنا
هتوحشونا ياما

قلبى هيسكن فى الضريح
عشان قلبى كافر بالقيامة
فا مع السلامة



الفين ندامة
عــ اللى مات الفين ندامة
من النهاردة هبكى عليكم
من النهاردة
ليوم القيامة

ملعون

لازم تحسى انى غبى ..وانى لعنى 100 نبى
وان قلبى ملوش امان وبيدى بحرف مذهبى
..
مجنونة معقول تعجبى ؟!! .. وكمان تحاولى تقربى !!
وبين الجموع تنزل رموشك .. تشن حرب فى ملعبى
..

نصيحة ليكى اهربى ...... و بلاش تناهدى وتتعبى
هتاخدى ضحك الناس عليكى .. وممكن كمان تتعيبى 

 

خبى عنيكى

 

 

متخبى يا شاطرة عنيكى
قلبى بصراحة خايف عليكى
يشوف جمالك ... يتغاظ كلامى
وانتى امامى يغمى عليكى

...

ليكى عايش

ليكى عايش وبيكى بحيا
وفى حضن قلبى نايمة وصاحية
رغم الفراق منتيش بعيدة
لان شايفك فى كل ناحية

 

مليش غيرك

انا عايش مليش غيرك
ومصيرى مربوط بمصيرك
انا فى بعدك منيش عايش
ومش عايز اشوف غيرك

انا جسمى خلاص اتهد

عيون غرقو فى مياه السد
فى ليل دمعى منيش شايف
ومش ضايق مرار البعد

انا قلبى خلاص اتشل
واهو اتمرمغ فى طعم الذل
انا ف بعدك شايف قبرى
غيطان مفروشة ورد وفل

انا ف حبك راجل جاهل
وجانى الحب بالساهل
وانا قلبى اهوه اتعلم
يموت على حاجة تستاهل

امانة ان جيتى يوم العيد
تعاليلى حلوة لابسة جديد
ومش عايز اشوف دمعك
خلاص دمعك معادش يفيد

 

حضنى وصاحبى

هو كان حضنى وصاحبى وكانت صفاته كويسة
كان يجينى البيت يصحى عشان نروح المدرسة

كان وديع طيب وهادى وكان بيسمعلى الكلام
كان حبيبى وفكره فكرى وكان بيشبهنى تمام

والله نفسى تعود لى ليلة من ليالينـــــا زمان
نفسى اشوفك تانى جنبى نمشي فى نفس المكان

لغز ف درب التبانة

كنا اتنين سواء عايشين
ومين ف الكون هيمنعنا

وعشنا سنين ترابها حرير
وكان العش بيسعنا

******
وكان لينا ضحكة تدفعنا
وكان لينا عين بتدمعنا

وكان لينا حضن يجمعنا
وكان لينا ودن تسمعنا

*******
لكنى محال دوام الحال
وده حال الدونيا وظروفها

وقبل اى كلام يتقال
فى حقيقة لابد نعرفها

******
قالو عنى كلام بطال
قالو فى واحده يعرفها

وجوه حياته فى الف سؤال
و كل حكاية مألفــــها

*******
وبعد ما باع الميت بفدان
جاب فلوسهم يصرفها

فايت داير ع النسوان
وكل مفاتن يكشفها

*******
انتى بتوفى بكل ايمان
وكل وعوده بيخلفها

سيبك منه ده مش انسان
ومنتيشى واحده مكتفها

*******
معقول حقيقة واضحة جميلة
وهو بايده ..... يزيفها

معقول وصية طاهرة جليلة
وهو بغشمة... يحرفها

********
وقالو لبانه صبح وليل
واخر اليل يتفتــفـها

وقالو ريحة عطر جميل
وبكره مسيره يكرفها

******
سمعت كل كلام اتقال
وبلاش تعيدى وتزيدى

ايوه بعت الميت فدان
وجايب فلوسهم على ايدى

*******
جاية تقولى بحب عليكى
بالذمة ده برضو كلام يرضيكى

ياللى عشانك ابيع الدونيا
ولا اقدر ثانية افرط فيكى

******
ياللى خدودك نيل رمان
زى العسل بلت ريقى

ياللى عيونك ليل سهران
وقمرها فارش لى طريقى

********
والله ان زرت كواكب تانيا
هفضل بعدك طيف بهتان

والله ان شفت حياتى التانيا
وانتى بعيده هكون ندمان

********
مافدرش ابعد عنك ثانية
يا ارق واجمل انسانة

ياللى معاكى بحب الدونيا
يالغز ف درب التبانة

ايدينا تمزق ايدينا

ايدينا تمزق ايدينا .. ..... وجواب الكل هذا نقداً
نلوم الناس بما فينا ... ويلوم الناس فينا عوضاً

لا فعل الناس يرضينا .. ولا فعلنا يرضى أحداً
كفعل الشجرة يغوينا.. ويفرقنا شيعاً حقداً

انتى

انتى ميه تبل ريق وانتى راحــــــة ف الطريـــق
انتى قلبى لما شافك ضـــب فيكـــى كالغريـق

قلبى شافك طوق نجاة جالى منقذ ف المــياه
والله انتـــــــى نعمة ليا وانتى رحمة فى الحياة

 

غنوة للألم

 

هغنى غنوة للألم .. لسجن وردة جوه شوك
بريحة فاحت بالعدم .. وشر دايم فى السلوك

 

 

انا انثى

 

 

انا انثى
تحررت من كل القيود
ف كل الناس رجمونى
واتهمونى بالجحود

انا الانثى
كمثل الناس أتالم
وان أخطأنا وقد نخطىْ
فأخطانا لنتعلم

ككل الناس انسانه
ككل الناس اتألم

 

ككل الناس انسانه
لكن الانثى لا تحلم

 

مجرد كلام

مجرد كلام
ان الحقوق دى كلها
ترجع قوام

فا قصر حروفك كلها
او لمها
وروح للعداله فى قبرها
وارمى السلام

يا مصر لية؟

صدقينى بقيت بخاف
وبقيت بغطى جتتى تحت اللحاف
..
ويبقيت تعدى ضحكتى حسب الظروف
ومبقتش سامع خطوتك ولا بشوف 

يا مصر ليه الرحلة طالت وكل راسيه فيكى مالت
يا مصر لية وانتى صريحة فيكى لون الحق باهت

كنت عارف

هذه ليست مؤامرة
يا سيدتى بل انه عشق المقامره
نعشق ونهجر بعضنا كأن العمر مغامرة
...

منا كنت عارف ان الحياه موجودة بوجودك
ومفيش غير لون الحياء...بيحمر اخدودك

.....
ومفيش غير الامل عايش انا وياه
وحبيبتى صارت وطن ..بحلم انا بسكناه

 

حياة بلا امل لا تحتمل

عايش الحياة من غير امل وف ايدى اية راح يتعمل؟
عايشها مين ؟ ولا ابن مين ؟ ... انا الحروف بين الجمل

عايشها حر ولا سجين مبقاشى يفرق فى الطريق
عايش الحياة اخرس ضرير... مربوط ونازل للغريق

 

أختى

أختى فى يوم حست ان اسمها فاطمة
واول ما قلتلها قامت قوام لاطمة
...

كيف يا واد تعشق ما تقولى يا منيل
قدامك بنات دينك ..ما تعبى وتكيل
.....

ولا البنات قطعت من الحسن قدامك

ولا مزاج تمشى ع الشوك باقدامك

زمان عربجى

بعشق زمان عربجى عاملنى انا حصانة
كرباجة فى يده وسايقنى قدامة
...
عاملى فيها ملك ..وعاوزنى خدامة
لو قلت يوم هدى يشد فى لجامه
....
وعاملى قال زمبلك ... يهز ويلعب
وان اراد الملك ...اكون كمان مولعب
....
يادى الزمان الردى... على فين ياواد تهرب؟
عاشق زمان عربجى وعمره ما يتعب

 

وصية قلبى الاخيرة

(وصية قلبى الاخيرة)

فى يوم من الايام قلبى عمل ميت
عامل لى قال عيان وقلبة متفتت

قالى كلام يوجع ومكنش اى كلام
... كلمنى ع الطيبة وازاى نعيش فى سلام

وكلمنى ع الاحزان وقلبة كان مفتوح
والدم مالى المكان واتاريه كان مدبوح
...
قالى كمان اسمع قبل الاوان ما يفوت
معيزكش يوم تدمع علية لما اموت

متقولش كان قلبى متقولش كان غلبان
متقولش كان محنى ومتعبى بالاحزان

واياك تجيب سيرة وتعيب فى احبابى
ولا شك ولا غيرة ولا دق على بابى

عايز الجنازة تكون م الفجر عند الحسين
وبلاش جنازة فى يوم خليها حتى يومين

وامانة بعد الحسين متجوشى ويايا
جيت الحياة وحدى فهمشى ويايا

وتجيب معاك مأذون يكتبلنا كتابها
هيقول اكيد مجنون ازاى ده فى غيابها

قولة يا شيخ حاضرة وهى ماليه المكان
ماتشوفها بالنظرة دى تشوفها بالايمان

اكتب يا شيخ اكتب متخفش من حاجة
والله ما بنكذب وما فيهاشى ولا حاجة

ومتكلفش نفسك كتير لا صوان ولا قداس
بلاش جنازة الامير ومشينى بين الناس

عايز اروح قبرى ماشيها على رجلى
ومعيزش كمان اجرى انا همشى على مهلى

همشيها بالراحة بالراحة ع الاخر
من صغرى وانا مزنوق ويقلو لى اتاخر

وبلاش كمان كفنى يكون كفن فاخر
من امتى كنا احنا بفلوسنا نتفاخر

خليك ياواد عاقل زاهد ومتصوف
عشت الحياة زاهد !! و ف موتها لية بتصرف ؟

خلى الفلوس عندك تنفع بيها العايشين
ياما قلوب زيى لساها شايلة الطين

حاول بيها يمكن تغير احوالهم
يمكن بيها تنور ويشوفو قدامهم

واكتب على قبرى

الله لم اراه
فعبدته فى بشر
جل من سواه
....

قلبى تحفة

قلبى تحفة
...
بقالى ساعة واقف معاه بره القزاز بشبه علية
معقول ياعالم ده هو قلبى...اللى اسمه اية؟

كل البنات واكلين بعقلك حتة حلاوة
يا هل ترى دى طيبة منك يادى القلب ولا غباوة

انا قلبى تحفة يا بشر فى مذار سياحى
ملفوف فى شاش وحتة قماش.... ودفنينه  صاحى

سيرة الوطن

فى البدايه قالو الوطن...... هو البدايه
هو فرحى بخطوتى لما تكون .......امى معايا

اصيل وعالى كالنخيل ويامحلا بلحه ملوش نوايا
قاضى بينصف فى الفقير وحكيم بيحكم بالنوايا

......
...... 

وف الطريق قالو الوطن هو الحكاية
هو عشق حد الجنون ..... لبنات بسيطه لافه الملايه
 

انك تكون شهم وجرىء وماتشوفش نفسك فى المرايه
وانك تشوف وطنك برىء لو حتى يدهس جتتك تحت الرحايه

 ......
.......

 وفى النهاية طلع الوطن عليه قضايا
فى النهاية طلع الوطن اجمل صوابع ورمت وشى وقفايا

وهو كفرى والهداية .......واول ضربه بالعصايه
وهو صرخه فى الطريق سببها خوفى من ضرايه

...........
..........
وعمال تقولى ياوطن اصبر تنول
وخليك حجر ساعة المحن وشهم وصبور

واكتب حروفى بالدهب 
واقرانى اية
وبلاش يخليك الغضب 
قاسى معايا

وخلينى فرحه فى الصدور
ورده كارهه للذبول

واكتب على سيرة الوطن

وطنى  نظره فى العيون لو طاوعها العقل يسرح
وارض اخضر م الزاتون وفيها خيل ابيض بيرمح

وقصور بتسكنها الديابه وعشش تعشش فى الغلابه
وقلوب تلين فى الحديد وقلوب تذود فى  الصلابه

......
......



يا بلاد وساكنه هى فينا ولو نشوفها بس نفرح
يا بلاد وقاعده بتداوينا مهما احنا فيها نجرح

انتى مكه والمدينه  وانتى واحه وفيها مذبح
وانتى بحرى والسفينه وراسيه بينا فى احلى مطرح

مهما نبعد جامعه لينا ومهما غبنا لينا مطرح
مهما ضلمنا وقسينا فيها شمس الحب تطرح

......

.....

يا سلام .... يا سلام .......يا سلام
طلع الوطن  باغلى ما فيه   مجرد كلام
طلع الوطن وحده غريبه بتملكك جوه الزحام
طلع الوطن انك تشك ف صحوتك والناس نيام

يا سلام

يا سلام

شوف الكلام

يا كلام بحبر على الورق يا وعود خريف
يا قلوب ضعيفه بتتحرق على الرصيف

يا سنان بتبرق م النشف مش م النضافه
يا نظره تايهة بتتخطف على الرغيف

مقادرشى اقولك يا وطن حرفين رخاص
وانا كل حته فى جتتى صابها الرصاص

ومقادرشى احبك يا وطن تانى من جديد
ومقادرشى اضمك ياوطن وانت بعيد

اياك فاكرنى يا وطن عيل بليد

ولا فاكرنى يا وطن مقطوعلى ايد

انا قلبى ضمك يا وطن وانت وحيد

ولساك فاكرنى ياوطن صخر وعنيد

......
......

يا بلد وضربت تفليسة ده السوس معشش فى القصب
مين اللى قال انك رخيصة ؟ يا ارض اغلى م الدهب

يا بلد وفيها الخوف مالينى يا بلاد وفيها شفت العجب
مقادرشى  احبك صدقينى انا قلبى فيا مات واتصلب

يا بلد وسايقه فى الرزاله يا بلاد ما تعرف الادب
عيالها تاكل فى الزباله وهى دايسه ع العنب

.......
.......

عمال بعاتب و الوطن ......... مبيختشيش
معلش اصل محبتى ...........مبتنتهيش

.......

.......

حلمت بيك ضهر وسند.... فى الضعف تسندنى
وقلت ليك انت الطريق .....وان توهت توجدنى

فاكرها مره جيتلك مريض والضعف مالينى
جيتلك وانا فكرى شريد وبقولك اشفينى

قلتلى لما الديك يبيض الصحه هتجينى
معلشى بقا دلوقتى عيد والكل داعينى

.......
.......

عشت الحياة علشان رضاه..... وكنت راضى بقسمتى
وكنت بغل وشغال معاه.... وحيلا اجرى لقمتى

انا ابن كلب مدلوق عليه.. وعمال ازيد فى محبتى
اخرتها قاتلنى بايديه .........اصيل و حافر تربتى

.....
.....

عمال بعاتب فى الوطن .........ليه مختشاش ؟
معلش اصل محبتى ...........جايه بلاش

اخرتها عامل ايه؟ شايفه رخيص فى السوق
وطنى اسم الله عليه معايزشى حتى يفوق

وطنى ...ابن البيه عايش بلا معشوق
عايزهم يقولو عليه خناق . ومات مخنوق

 

 

متفكريش فيا

 متفكريش فيا ومتذوديش همك
مفيش امل فيا ومظبوط كلام أمك

واحلامى مش ليا ...حتى اسألى عمك
فامتقربيش للغريب .. وحبى اللى من دمك

ومتتمسكيش بالغريق .....ومتميليش بختك
فرق السما بينى ..وبين عريس أختك

مين اللى قال خايف ...ده انا بريد راحتك
ده انتى السما بحالها ... وانا بعيش تحتك

وعيونى مش متغيرة .. ولا خفت من ساحتك
بس انتى لسة صغيرة ..ومعرفاشى مصلحتك

وانا قلبى ميحملكيش .........ولا احضانه هتساعك
وانا عايب فامتحاوليش .......... تحلى فيا بدراعك

عشت سنين واخدنى الطيش وكنت ف كل ايد لعبة
وبعد ما توهت انا وحفيت.... قلت اعود من الغربة

وقلت اتوب على ايدك............. مدام التوبة مش صعبة
اتارى التوبة متكفيش ..........ولا طوفانى فى الكعبة

فا مترقصيش وسطك ...ولا تمسكيش طبلة
لا كنت يوم عنتر ...ولا كنتى يوم عبلة

ولا قلبى كان عابد....... ولا يمك القبلة
ولا فى عنين اهلك ...راح تفرق الدبلة

ومتحسبيش ياما ..عيزاشى هيا حساب
ده انتى زى اليمامة ..وانا زى الغراب

عشقت قبلك كتير ومفضلش فيا شباب
عاملونى زى الامير ورمونى رمى الكلاب

وعلمت ف قلبى ياما ما انا قلبى كان كُتاب
حفظت الابيض والاسمر.. وسمعولى غياب

حفرت فيهم كلامى  وكتبت سطور عذاب
ما انا اصلى كنت المؤلف وهم كانو الكتاب

وميغركيش شكلى ده انا شكل ع الفاضى
انا قلبى بير ميه ........لكنة بير فاضى

وما دمت انا ميت .. لية نتعب القاضى
حرام ضياع وقتك .. يا حبيبتى ع الفاضى

انا قلبى كان استراحة ...معمولة للزوار
فيها الامان والراحة .. ومفتوحة ليل ونهار

وانا قلبى ياما اتملى ...بس الزمن دوار
سيبينى اموت ف الخلا .. وكملى المشوار

ما كلهم كسرونى ....وخلونى 100 حتة
زمان انا كنت مجدع....... وفارس الحتة

دلوقتى مش شايف وبجر ف الجتة
بمشى وانا محنى وكامش فى جاكتة
 

ايوه انا مكح كح و600 كحكوح
بمشى وانا بنهج وعايش حلاوة روح

العمر ضاع منى والقبر باب مفتوح
فا متعى عنيكى بالفرجة فوق السطوح


وانا قلبى ماشى غلط  وعمال يدوس ع النار
لحبايبة بالع الزلط وبيصدق الاعذار

معرفش يعشق ع كدو ومعرفش يوم يختار
وادى الزمان هدو .... وانا هضربو بالنار

فا متفكريش فيا ومتذوديش همك
مفيش امل فيا ومظبوط كلام أمك
 كونيش ف يوم ليا وحبى اللى من دمك

أفرحى ولا تزعليش

لو يوم قالولك ده حب غيرك 

أفرحى ولا تزعليش
ادى اللى عام وغرق فى خيرك

أصبح خلاص ميخصكيش

ادى اللى كان ملهش غيرك.... قادر يعيش
عشتى فى وهمك كأن طيرك....ملهش ريش
فا مهتمتيش فا متزعليش

ومتزعليش لو قالو ناسى شكلك واسمك
مش ده اللى كان ع الحيطة راسمك
مش ده اللى قال:  روحه ساكنة جوه جسمك
ولا كلامه.....ميخصكيش ؟؟!!

ادى اللى كان حتة ولد .. ملهش ريش 
اصبح بطل مليون رواية... مبتنتهيش
وكل يوم عايش حكاية ...من النهاية
اصبح ولد....... مبيختشيش

وصبحت حيطانه أرض حكايات
يزرع غزل تطرح بنات
ومبقاش يفكر فــ اللى فات
فـانتى كمان ......متفكريش

بس لوحد قالك انه خاين... وانه ندل
وانه هو محبكيش .....متســــــكتيش
أصل انتى عارفه.. قد اية طول غيابك ؟
وكـــنتى حتى........ مبتسأليش


الف مره قلتهالك....وكنتى قاصدة متسمعيش
أرجعيلى يا أغلى غالى.....وكنتى برضو مبترجعيش

هى كلمة اسمعيها ...وبعدها متسأليش
قلبى لما حب غيرك ...حب بس علشان يعيش

صدقينى مخنتكيش

تملى سهتانه ودلوعـــة غلــــــــبانه
وابسط كلام عندك .....معلش تعبانة

فكرتينى بهشـــــــــام وحكايته مع نانا
انتى ( .... ) وهى نانا...وع الاسامى مدقيش


قولى فاضل لينا اية..عشانه هنعافر
ومركبك ولا يوم رست.. وطوالى بتسافر

وقلبى من قسوتك..... يصعب على الكافر
وبصراحة انتى قاسية ..... مبترحميش

باعت انا ف جوابات...مشتاق انا لــردك
مكتوبة بالانات ..ترميها لية ف درجك ؟

مبين لقاء وفراق ....ملاقيشى غير صدك !!
حتى فى صــــــــــدك ... مبتوضحيش


 عارفة طول مانتى فيتانى وعيشالى ف الغربة
بمشى وانا بضحك وف جنبى 100 حربة

عايش كما الميت ....لكن مليش تربة
وحتى الرحمة .....متجوزليش


من ساعة ما فوتينى والدونيا لاوية البوز
بطنطط عشان تضحك وبعملها اراجوز

الجسم جسم شباب ... والقلب قلب عجوز
والعمر فات يجرى ....يجرى ولا رجعتيش


لو يوم سمعتى انى عايش وانى حى
 وان بعدك مهزنيش ...افرحى ولا تزعليش

 الف مرة قلتهالك ...غصب عنى قلبى حب
ولما حب ...حب بس عشان يعيش

فـــ أفرحى ــــ ولاــــــ  تزعليش 

 
                          

استجواب...حمزة كاشغري

(( هذا الاستجواب من محض الخيال

تضامنا مع حمزة كاشغرى ))

أستجواب

مالك بالدين يا حمزة

دى قنابل فتاكة

يابنى هو انت تفهم

فى نجارة وسباكة

بيدك بهدلت دينك

يابن الشكاكة

عاملى نفسك معلم

وامك دكاكة

مالك بالدين يا كافر

يابن المشفوطة

فكك يابنى وشربلك

قهوة مظبوطة

عمال تنقد وتملص

وركبك مفكوكة

عمال تفشر وتالف

حكاية وحدوتة

مالك يا واد يا حمزة

ما تقصر ف الكلام

ده انتا والمعزة واحد

لدبح والسلام

ادى جزاة اللى يلخبط

ويخبط ف الاسلام

بأيدك نصبت فخك

وصادوك زى الحمام

قولى  لية فتحت مخك؟؟

ما كنت عايش فى السليم

حكم  القتل هيكون بطخك

واللى يعيش بس اللئيم

بقالنا كتير بنصور

كلامك ع الفيس بوك

وانت عمال بتهبل

وعمال ترغى وتلوك

وحولنا أحنا القضية

للأمر بالمعروف

ونهايتك يابنى سودة

ولسة ياما تشوف

أديك هتموت لوحدك

وأصحابك دول باعوك

بكره يشوفو حدك

و بالكتير... هيدمعوك

متقولش لي .... سيبنى

وارجوك وأعمل معروف

ده انتا والنعجه واحد

لكنك مش معلوف

استحالة يعفو عنك

استحالة يرحموك

قتلك انت حاجة سهلة

وبعدها مش هيشوفوك

الفجر عندك زايد

والكفر والعناد

والله بكرة هتولع

على ايدك البلاد

لو سبناك عايش هتكبر

وهتكفر العباد

اسمع كلامى والا

هدوس على الزناد

 

مبقاش فاضل لى

مبقاش فاضل لى من حبك

غير شوية ذكريات 
 

دوسى عليهم وقتلينى

وشنقينى من سكات

وان سألوكى مره عليا

قولى انى ماضى وحب فات 
 

ملعون ابوه الحب

ملعون ابوها الحياة

مـ البداية وانتى عارفه

انى بكره السكات 
 

مـ البداية وانتى طبعك

أختراع المشكلات

وبصراحة انتى شايفه

كل يوم تنقص حاجات

والحقيقة انتى راضيه

ابقى عايش ع الفتات

 الحقيقة انتى عايزة

صورة تملا الالبومات

 انتى يدوب تبقى صديقة ... اوعشيقة 

نحكى ليها الممنوعات

 

اشطبينى من كتابك ... واعتقينى من عذابك  

وارحمى قلبى اللى مات

 خرجينى من سجونك ... واطردينى من عيونك

 وبلاش روتين الاجراءات

مدمعيش مره عليا

ومتعمليش زى البنات
  

بلاش كلام ع الانسانية

وبلاش كلام المؤمنات 
 

من صغر سنى وقلبى عارف

انه مخلوق للممات  

ملعون ابوه الحب

ملعون ابوها الحياة

فيديو : 

http://www.youtube.com/watch?v=mhJ3bE1eqoU&feature=youtu.be