انا مش كافر لكنى

ياللى اهدوك الذهب والمر واللبان 
الذهب اهوه ذهب والمر بحياتنا بان

يالى اتولدت بمذود بمذود قال فقير
فى ناس كتير اهيه من الفقر ميتين

يالى شفيت الاعمى بعد ظلام سنين
ناس كتير عارفها فى الظلام مخلدين

يالى شبعت شعبك بسمك وخبزتين
 ناس كتير فى بلدى جعانه مهمشين

يالى حررت المقيد والعبد والأسير
 ناس اهم دايما فى الذل مأسورين

يالى لعنه الشجرة اللى ما فيها تين
تعالى شوف الغلابه فى الدولة منهوبين

يالى هديت العواصف بكلمة فى ذات الحين
قول كلمة للعواصف والزلازل والبراكين

ياللى بكلمة منك عقلت ناس مجانين
اعرف انا مستشفى مليانة ناس مجانين

ياللى احييت لعازر وكمان ابنة نايين
تعالى شوف قبورنا مليانة ميتين

انت سددت دينك زمان من بطن سمكة
تعالى سدد ديونا ولو من بطن فيل

يالى حررت بشرى مسكون بشايطين
فى ناس كتير اهيه مرضاء نفسيين

يابنى ده اكيد لحكمة من رب العالمين
بلاش تكفر لايبقى مكانك فى الجحيم

انا مش كافر لكنى بدور على اليقين
دى اسئله عادية فى دماغى من سنين