سرمدية

انتى حبك سرمدى
والسرمدى ملهوش نهاية
ازاى قوليلى اهتدى
وانهى فصول اغرب رواية

ازاى قوليلى انسى حبك
وانسى كل الذكريات
انسى انى كنت جنبك
واقتل كلام الاغنيات

انسى ساعة لما شفتك
ولما الشوق لون عنيكى
وانسى انى فى يوم عرفتك
وانى كنت بموت عليكى

قلبى حبك وكنتى عارفه
وكنتى باصة بابتسامة
ازاى حبيبتى لما تمشى
متقوليشى مع السلامة !!؟

شىء طبيعى فى عصر الحديد
كل شىء عندك يهون
فعل عادى و ماهوش جديد
ان اوفى الناس تخون

الحمامة تصبح غراب
ويشن حرب غصن الزاتون
يا اعيش حياتى فى اغتراب
يا اعيش مطارد مـ القانون

ومنيش قادر اكون عطيل
ولا حتى اخد تارى منك
ولا قلبى قادر عنك يميل
او ينسى مره سؤاله عنك

معقولة ده رد الجميل
وهو ده كل اللى همك
انى ادور عــ البديل
وانى ابطل اشيل فى همك

كان حلم عمرى يطول شروقك
يا شمس رايحة للغروب
لسه الخيانة بتجرى فى عروقك !!
يا نسخة من فيلم الهروب

قولى انى شخص تحفة
وقطعة غالية كنت فى بزارك
وف قلبى كانلك الف شرفة
ومكنتش اشبع من هزارك

عارف انى غلطان وعايب
وعدل اغرق فى بحر جاز
معقول يا قلبى لمــا تعشق
تعشق أميرة مـ الحجاز

ازاى يا قلبى وانت قديم
فـ الضلمة نورك لمبه جاز
وعمرك يساوى كام مليم
لا هـيكفى حب ولا جواز

وجاى يا قلبى تلوم عليها
عينك فى عينى بذمتك
بلاش تجيبى اللوم عليها
ولوم غباوة حضرتك

وقولى اية مكتوب علينا
ياللى حبك سرمدى
معقول صحيح احنا انتهينا
ولا احنا لسه هنبتدى

متخافيش وقولى الحقيقة
وبلاش كتير تترددى
وبلاش تقولى انك بريئة
وان الزمان المعتدى