انا بشرب

انا بشرب عشان انسى
ولا بنسى علشان اشرب
بشرب عشان اهرب
ولا بهرب عشان اشرب
وادينى طول الوقت بشرب
لابنسى ولا بهرب
بس بشرب

يمكن همى ميتنسيش
يمكن حزنى ميختفيش
لا برشام ولا حتى حشيش
لكن بشرب

يمكن بشرب
علشان انسى انى بعيش
وسط ناس الوان ورانيش
والالوان ف بلدنا كتير
مالها وصف ف التمثيل
ياخى اشرب ومتحكيش

يمكن بشرب
علشان انسى انى بعيش
فى شرق بلاد العواجيز
وانا شاب وعايز اعيش
اسكت بقى ومتخنقنيش
اشرب

يمكن بشرب
علشان انسان مش حيوان
والانسان فى بلادنا مهان
اصل بلدنا سجن كبير
بدون سجان ولا قضبان
اشرب وانسى انك انسان
عيش حيوان

يمكن بشرب

علشان مصرى علشان طرطور

علشان انسى  فمفكرش فمقررش

فمتغيرش وافضل كده على طول الخط

عايش مقهور ماشى مخبول

علشان بينى وبينك انتى 

الفين سور