فتح عينك فتح برق .... بكره اكيد حلمك يتحقق
غمض عينك أمن صدق.......ربك قادر ع التغيير
اللى انهاردة شايفة عسير... ومش نافع فيه التعديل
لو كان امرك امر خطير .... ربك برضو رب كبير
اللى عليك ماشى يتريق .... واللى باصصلك كدة ومبرق
بكرة الناس علية تتحمرق ..... بكرة عقله منه يطير
وادى عنتر ماشى جنابو.... ويا مراته قاصه شنابو
ماشى يقرقط على نيابو..... انا مش ممكن منه اغير
وده يتفشخر باللى ف عبه... وكل الناس قدامه بتحبه
ومن وراء منه الناس بتسبه.... اصلة ظالم خلق كتير
اسمع منى وده اللى تقال.... اوعى تخجل منى ياخال
عمر الراجل مرجلو مال.... حتى ان كان ولد وزير
عمرى ما كنت ف يوم بطال...ولا غيرنى ضيق الحال
دايما راضى وعال العال ..... والله نعمة وفضل كبير
اه والمرسى ابو العباس..... دول الفقراء اجدع ناس
كب المر وعبى الكأس...... فرح وغنا انغام وعبير
تقدر ترقص وقت الحزن.... تقدر تضحك وقت الحزن
حزم نفسك ارقص جن ..... خلى غراب الحزن يطير
عمر الفرح ما كان بالمال.... عمر الحزن ما كان بالمال
افرح ارقص غنى يا خال...... وريح راسك م التفكير
اضحك يابا فرفش مالك؟.... لية بتلوم يابا عيالك؟
ضيعو عمرك وبعترو مالك... من ناس بره لية بتغير؟؟
عيال مين اللى اغير منهم؟؟..... بلاش تحكيلى كتير عنهم
انا خابزهم وانا عاجنهم...... عيال الناس دول فرافير
لو ف العقل اعقل منهم... ..لو ف الحسن أحسن منهم
بص يابا بص لمالهم....... عمر المال مارقى غفير
خايف يابا انى أعنس.... بص مافيش راجل بيعنس
ممكن يابا العمر يعنس.... بص انا هفضل برضو صغير
عارف يابا نفسك اتجوز ..... وده اتستر وده اتجوز
ولاوى وشك لاوى ومبوز.... نفسك تفرح فرح كبير
تعرف يابا امر خطير... ابنك ممكن يبيع بشاكير
ممكن يسرح عيش وفطير... بس مقامى برضو كبير
كيف من غير ما اصرخ اه..... كيف الناس عتقول الله
كيف المبلى تهون بلواه .....لما يشوف بلوات الغير
ولو مسودش بيا الليل ....كيف القمر يبقى جميل
كيف هنغنى وكيف هنميل.... كيف هنريح كل اجير
كيف الناس هتغنى يا عين.... من غير اها ولا اتنين
كيف الدمع يداوى العين......من غير جرح وجرح كبير
كيف الورد عطورة تفيح ... غير بالقتل والتجريح
كيف البلبل صوته يصيح.... لما يلاحظ امر خطير
اطمن يابا ولدك زين...... افضل واحد بين الاتنين
خمرة شعره ونبيذ زين....تسقى ملك عمدة وغفير
اصل الرك ع الاساس.... ابنك ماشى مرفوع الراس
ناقش علمه ع الكراس ... ماشى بيعلم صغير وكبير
ليست هناك تعليقات:
إرسال تعليق