ضحك ولعب وفشر وكذب
الرجل تدب ماطرح ما تحب
بالعين هتشوف لما تشب
كل حقايق الناس أسطورة
الكل يقولك أحنا وبس
هنا وبس تشوف وتحس
قرب منا أكيد هتمس
وجه الله ف أحسن صورة
أحنا شعب الله المختار
ماشى معانا ليل ونهار
لية خايف؟ولية محتار؟
أمن صدق تشفى العورة
أحنا ابونا أبراهيم
وأسم الهنا الوهيم
رئيس أحبار السنهدريم
كل قلوبنا بيه مسرورة
أحنا عبرنا بحر سوف
ورئيس اعدائنا بات مكسوف
بص بعينك بص وشوف
أصل الهنا أيده قديره
ضرب مصر عشر ضربات
نزل فيها جميع ويلات
البن ف ايده صبح شربات
خلى مصر تبات مقهورة
أحنا فى دينا مسيحيين
كمالة دين اليهوديين
الهنا آله صادق وأمين
مش أوهام ولا اسطورة
أحنا شعب الله المحبوب
عشانا الهنا مات مصلوب
شايف كاشف كل غيوب
على كفه اسامينا محفورة
أحنا حبيبنا أسمه يسوع
ماسح بأيده كل دموع
عمره ما جف معاه ينبوع
حتى الصحراء بيه معموره
أحنا كلامنا زى حمام
أحنا حقايق مش اوهام
ويا الحب مفيش خصام
بالحب نغير ناس شريرة
طريق الله هو يسوع
لو انكرته مفهش رجوع
امن نعمل ليك اسبوع
تفرح بيك السما والجيره
أحنا دينا ده الاسلام
جايب دينا خير وسلام
فينا شيخنا كبيرنا أمام
بضحكة خلى الناس مسرورة
أحنا دينا دين توحيد
جانا رسول خاتم وفريد
تقدر تلبس لبس العيد
لو تحفظلك يجى كام سورة
كل كلامنا جد ف جد
بص مفيش فينا مرتد
اسمع كلمة بقولها بجد
أمن تسلم مش فزورة
أحنا رسولنا لينا معين
هادى ورحمة للعالمين
قرب قلى يقدر مين؟
يقلد كلمة قالها ف سورة
دين الله هو الاسلام
أى كلام تانى اوهام
أمن تبقى اكيد فى سلام
كذب تبقى غورت فى غوره
ده تلخيص كل الاديان
فيها شيطان وفيها ديان
وفيها السلم والثعبان
نفسك تعرف أصل الصورة؟
كل دول ياناس تقليد
ومجاش فيهم أى جديد
ولا فيش منهم شىء هيفيد
بس مكرر للأسطورة
ادخل فتش جوه الدين
جوه الدين منقسمين
ركعو وسبو وقالو أمين
حتى أمين اصلها اسطورة
راجع راجع ف الاسطورة
فسر كل نقوش محفورة
قارن الاصل هناك بالصورة
هتعرف ان الدين شبوره
خايف احكيلك عقلك يطير
عاوز اقولك وبدون تغيير
علشان تعرف انت والغير
قارن دينك بالاسطورة
لازم تسمع عن جلجامش
هوه نوح هوه, ولا مش
أقراء وافهم وبطل غش
بطل تخدع م الاسطورة
أكيد مسمعتش عن حمورابى
أول شرع كان كتابى
أول من شرع حمورابى
مش موسى أصل الاسطورة
اكيد تعرف اخناتون
أول من وحد أمون
هو العازف ماشى ع التون
وغيرو حقايق لكن مستورة
اخناتون ناشد اناشيد
داود عبد وهو السيد
سارق منه كتير اناشيد
اناشيد أصل ومزامير صورة
فتش كل حكاوى زمان
هات من بابل لليونان
أقراء ترجم أقراء كمان
أقراء تسهل كل عسيره
أقراء عن بوذا وكرشنا
يمكن بولس والله غاششنا
أقراء يا شيخ بطل تدوشنا
كلو مقلد , مش فزورة
اقراء عن اديان الهند
اقراء عنها وطوف فى السند
هتلاقى الواد شبه الجد
هتلاقى قبورنا هناك محفورة
انتم شعب الله المحتار
ما بين جنة ما بين نار
زمن الكذب ولى ودار
وانتم لسه فى توهة وحيرة
قولها بصوتك بطل همس
انا مش هوه بتاع الأمس
كل كلامكم همس فى همس
قالو وقلنا عن ابن هريرة
واللى قالك كلام رحمان
بص شوف سجع الكهان
زى كلام سطيح الغلبان
والزرقاء
بنت زهيرة
أخر واحد جانا بدين
سارق جامع م الاتنين
جاى بشرع وجاى بدين
جاى حافر حفرة محفورة
أسمع منى فتح شوف
كل كلامى ع المكشوف
رتب جمع كل حروف
بطل لف وبطل حيرة
سبقوهم هم خلق كتير
وكل كلاهم صار اساطير
طير بجناحك رفرف طير
اوعى تصدق ناس مسحورة
أوعى تصدق أى كلام
أياك تلبس مره لجام
ريح راسك أغفى ونام
يمكن بكره تموت اسطورة
جوه دينك انت حقير
انت أكيد انسان شرير
ربك ناس فيك تصغير
حتى دماغ ربك شريرة
ريح نفسك يا انسان
لية تقبل تعيش غلبان
لية تأخد بالقمح زوان
بأيدك توصل لأجمل صورة
بأيدك بس انت بنيت
انت زرعت وانت جنيت
بطل بس تقولها ياريت
لسه الغد بيحمل نوره
ليك المجد وكل جلال
كسر حطم كل غلال
افضح كل كلام اتقال
حاول تخرج من البلورة
ليك العظمة يا انسان
ليك القدرة والسلطان
ليك الشكر والعرفان
تشهد عنك أى اسطورة
أنت أنت فى كل زمان
أنت الزهرة والبستان
أنت الغنوة والألحان
أنت الحل والفزورة
أنسان يا سر الوجود
أنت الحق وانت الودود
بأيدك عبرت أعلى السدود
بعلمك عبرت بحور الحيرة
أنت الأب وأنت الولد
أنت البناء وأنت الهدد
انت الآله وأنت الصمد
أنت الأصل والتصويرة
روعه .... جد قصيده هادفه مسؤوله وواعيه ... بالتوفيق
ردحذفحبيب قلبى يا باشا متحرمش منك ابدا
ردحذف