فى رحاب فالنتينو

فى دين العم فالنتينو ... مذهب والناس معتنقينو
على نور الشمعه السهرانه فاتحين الراديو وسامعينو

قديس و قاعد قدامى..  وانا لسه بـ ته ته فى كلامى

طبطب عليا وقالى بوح .. وأمرنى افضفض بالامى 

انا العاشق وانا الولهان ... وبتذكر ليالى زمان

انا لوحدى فى عيد الحب ... وبتونس مع الاحزان 

كل سنة وانت طيب
يا حبنا الشايب

 يا نبضنا الحاضر 
يا قلبنا الغايب

يابو خطوه تشل  مرعوشه

يابو ضهر محنى 
يـ ابو قلب دايب

كل سنه وانت هاجرنى .. وانت رابطنى .. وانت أسرنى

كيفك هناك تفضل بعيد .. وانت بعيد... بعدك كاسرنى

ياقلب وسهم ع الحيطة .. يا اشيك بنت بيـ برنيطة

يا مرسومة ف دخانى ... ياصوت اللمه والزيطة 

ياما كان نفسى انول الحلم ... ويتحول خيالى لعلم

وتيجى تشعى هنا بنورك .... ويتبدد سواد الظلم 

 

انا الملفوف هنا بيكم ... قتيل والقبر عنديكم

بردان وحاضنى التابوت ... وبتشيع على ايديكم 

يا قصور ومبنية بكلام ... يا طفل تايه ف الزحام

يارعشة جايه ف عز موت .. يا اسم محفور ع الرخام 

يا عيد الحب مت فى سلام ... لعل عيونى غدا قد تنام

اطوى جراحى ودمع العيون...لعلى أعيش غدا فى وئام